Ադրբեջանի օմբուդսմեն Էլմիրա Սուլեյմանովան «առանց նախնական տեղեկացման» այցելել է Ազգային անվտանգության նախարարության ժամանակավոր մեկուսարան։
Ինչպես հաղորդում է Report-ը՝ վկայակոչելով օմբուդսմենի աշխատակազմին, այցի նպատակը մեկուսարանի պայմաններին, բանտարկյալների նկատմամբ վերաբերմունքին եւ նրանց իրավունքների ապահովմանը ծանոթանալն էր։ Օմբուդսմենն առանձին-առանձին հանդիպել է վերոհիշյալ ուղղիչ հաստատությունում պահվող Ռաուֆ Միրքադիրովի, Արիֆ Յունուսի եւ այլոց հետ։
«Հանդիպումների ընթացքում բանտարկյալներից ոչ մի բողոք չեղավ բանտարկության պայմանների, իրենց հանդեպ վերաբերմունքի առումով, նրանք ասացին, որ բավարարված են սննդի որակով եւ բուժծառայությունների մակարդակով։ Վերջում ուղղիչ հաստատության ղեկավարությունը անհրաժեշտ հանձնարարականներ է ստացել բանտարկյալների կյանքի պայմանների կատարելագործման վերաբերյալ», - փոխանցում է աղբյուրը։
Իրոք, առնվազն տարօրինակ կլիներ, եթե քաղբանտարկյալները որեւէ բողոք ունենային։