Վերջին մեկ ամսվա ընթացքում հայ-ադրբեջանական սահմանին իրավիճակի սրման հետ զուգահեռ մեծ քանակությամբ կեղծ կայքեր են հայտնվել, որոնք խուճապ առաջացնող, անհեթեթ տեղեկատվություն են տարածում: Այս մասին այսօր՝ հոկտեմբերի 6-ի, լրագրողներին ասաց մեդիափորձագետ Սամվել Մարտիրոսյանը:
«Անհայտ կայքեր են, որ ոչ մեր ունեն, ոչ հեր ու տարածում են անհեթեթ տեղեկատվություն: Սկզբում հիմնականում անմեղ նյութեր էին տարածում, բայց սահմանի հետ կապված ահռելի քանակի՝ խուճապ տարածող տեղեկատվություն լցվեց ցանց՝ օրինակ, թե իբր հրթիռակոծվում է Իջեւան քաղաքը»,- ասաց փորձագետը:
Փորձագետը նշեց, որ նման կայքերը վերջին շրջանում հրթիռակոծության տեսանյութեր են տարածել, որոնք սխալ են ներկայացվել ու իրականում վերաբերել են ուկրաինական կոնֆլիկտին:
Սամվել Մարտիրոսյանը խնդրին լուծում տալու համար օգտատերերին խորհուրդ է տալիս չբացել սոցիալական կայքերում տարածված այն նյութերը, որոնց վերնագրերում կտեսնեն «Շտապ» կամ «Հրատապ» բառերը, չվստահել այն կայքերին, որոնք հստակ նշված հասցե եւ խմբագիր չունեն, առավել եւս, չտարածել այդ կայքերի նյութերը:
«Դա նույնն է, որ բորբոսնած մածունն առնեք եւ հարեւաններին կանչեք, հյուրասիրեք: Եթե մարդ հանկարծակի փչացած ինչ-որ բան է առնում, գերադասում է չառնել, իր ծանոթներին էլ է ասում՝ մի գնեք այս արտադրողի պանիրը, մածունը, այն փչացած է»,- նշեց փորձագետը:
