Լյուքսեմբուրգի Եվրոպական դատարանը երեքշաբթի անվավեր է ճանաչել ԱՄՆ-ի հետ առեւտրային նպատակներով տեղեկությունների փոխանակման «Անվտանգ նավահանգիստ» (Safe Harbour) պայմանագիրը։ Այս մասին գրում է AP գործակալությունը։ «Անվտանգ նավահանգիստ» պայմանագիրը եվրոպացիների քննադատությանն էր արժանացել այն բանից հետո, երբ ԱՄՆ հատուկ ծառայությունների նախկին ծառայող Էդուարդ Սնոուդենը 2013թ. տեղեկություններ էր հրապարակել այն մասին, որ ԱՄՆ ազգային անվտանգության գործակալությունը զանգվածաբար լրտեսել է ոչ միայն ԵՄ քաղաքացիներին, այլ նաեւ որոշ եվրոպացի առաջնորդների։
Ավստրիացի ուսանող Մաքս Շրեմսը 2 տարի առաջ դատական գործ էր սկսել՝ բողոք ներկայացնելով Իռլանդիայի տվյալների պահպանման հանձնակատարին։ Նշենք, որ ԵՄ-ում Facebook-ի գրասենյակը գտնվում է Իռլանդիայում։ Նրա բողոքի էությունն այն է, որ ԱՄՆ օրենքը սոցիալական ցանցերով հաղորդվող տեղեկությունները լրտեսումներից բավականաչափ չի պաշտպանում, գրում է «ՌԻԱ Նովոստի»-ն։
Երեքշաբթի Եվրոպական դատարանը վճիռ էր կայացրել Շրեմսի օգտին։ «Եվրոպական դատարանը անվավեր է ճանաչել ԱՄՆ-ի եւ ԵՄ-ի միջեւ «Անվտանգ նավահանգիստ» պայմանագիրը»,- մեջբերում է դատարանի որոշումը AFP-ն։