Սեւան-Դիլիջան թունելում այսօր` օգոստոսի 26-ին տեղի ունեցած հրդեհի առթիվ ոստիկանության քննչական գլխավոր վարչության Գեղարքունիքի մարզային վարչության Սեւանի բաժնի քննչական բաժանմունքում նյութեր են նախապատրաստվում: Ինչպես NEWS.am-ին հայտնեց հենց նոր դեպքի վայրից վերադարձած ֆոտոլրագրող Գագիկ Շամշյանը, Ոստիկանության Դիլիջանի բաժնում առգրավել են այրված ավտոբուսում գտնված 2 ուղեւորների` 47-ամյա Կամո Շաբոյանն ու 36-ամյա Նունե Աղաբեկյանի հագուստները, քանի որ դրանք ուղարկվելու են փորձաքննության: Երթեւեկությունը նշված հատվածում ժամը 18:30-ից բացվել է:

Թունելում աշխատանքներ իրականացնող ծառայողները նշել են, որ եթե ժամանակին Արտակարգ իրավիճակների նախարարության հրշեջ ծառայության աշխատակիցները չմարեին կրակը, հնարավոր է, ավտոբուսի վրա եղած գազի 4 բալոնները պայթեին, ինչը կարող էր հանգեցնել թունելի այդ հատվածի փլուզման:

ՀՀ ԱԻՆ լրատվական ծառայության ղեկավար Նիկոլայ Գրիգորյանը NEWS.am-ի թղթակցի հետ զրույցում նշեց, որ եւ ավտոբուսի վարորդը` 39-ամյա Գարիկ Սանիկի Մկրտչյանը, եւ մյուս երկու ուղեւորները` Կամո Շաբոյանն Նունե Աղաբեկյանը, արդեն Դիլիջանի հիվանդանոցից տեղափոխվել են Երեւանի հիվանդանոցներ: Նրա խոսքով, Նունեի վիճակը բժիշկները գնահատում են ծանր, իսկ մյուս երկուսինը` միջին ծանրության:

Հիշեցնենք, որ այսօր ժամը մոտավորապես 15:30-ին Սեւան-Դիլիջան թունելում այրվել է KBЗ մակնիշի 04 ՏԼ 165 համարանիշի ավտոբուսը, որի մեջ բացի վարորդից, եղել է նրա կինը, մեկ տարեկան երեխան, եւ եւս երկու ուղեւոր: Մայրն ու նրա գրկին գտնվող մեկամյա երեխան մահացել են, մյուս երեքը վիրավորվել են: Վարորդը հայտարարել է, որ ճանապարհին ձայն է լսել, մեքենան կանգնեցրել է, պարզելու համար, թե ինչումն է խնդիրը, այդ ընթացքում մեքենայում հրդեհ է բռնկվել: Նրանք գնալիս են եղել Հաղարծին գյուղ: Ավտոբուսը գյուղմթերքներ է տեղափոխելիս եղել, ավտոբուսում նկատելի են այրված ձմերուկների ու ցորենի հետքեր (ֆոտոռեպորտաժ):

Լուսանկարը եւ տեսանյութը` Գագիկ Շամշյանի