Հայաստանի պետական բյուջեն 2016թ. կլինի ոչ թե տնտեսությունը զարգացնող, այլ այն զսպող, քանի որ երկրորդ պլան է մղվում ներդրումային քաղաքականությունը։ Այս մասին հոկտեմբերի 6-ին կայացած մամուլի ասուլիսի ժամանակ հայտարարել է Հայաստանի հայրենական ապրանք արտադրողների միության նախագահ Վազգեն Սաֆարյանը։
Նրա խոսքով՝ ներկայիս պետական բյուջեում բավական մեծ մաս է կազմում դեֆիցիտը՝ 190 մլրդ դրամ, որից 120 մլրդ դրամը պետք է ձեւավորվի վարկերի հաշվին։ «Այստեղ սպառողական բյուջեն ավելի առաջնային է, քան ներդրումայինը։ Այդ ճանապարհը համաշխարհային հերթական ճգնաժամին ընդառաջ գնալու փորձ է»,- նշել է Սաֆարյանը՝ հավելելով, որ ներդրումային տեսակետից պետական բյուջեի հնարավորությունները սահմանափակ են։