Ֆինանսական շուկայում դրույքաչափերը դեռեւս պետք է բարձր պահել՝ կայունության երկարաժամկետ սպասելիքներ ստեղծելու համար: Այս մասին հոկտեմբերի 6-ին խորհրդարանում հայտարարեց Հայաստանի Կենտրոնական բանկի փոխնախագահ Ներսես Երիցյանը:
Նա նշեց, որ 2014 թվականի նոյեմբեր-դեկտեմբերի արժութային ցնցումից հետո, երբ հայկական դրամը 15%-ով արժեզրկվեց, իրական անկայունությունը հաջողվեց հարթել՝ կտրուկ բարձրացնելով դրույքաչափերն ու կանխելով չաշխատող վարկերի աճը: Եվ չնայած նախկին ծավալներով իրական վտանգ արդեն չկա, սակայն բացասական սպասելիքների վտանգը դեռեւս կա: Դա հարթելու եւ ցածր գնաճի ակնկալիք ստեղծելու համար, հարկավոր է դեռեւս որոշ ժամանակ պահպանել դրույքաչափերի մակարդակը:
Նշենք, որ 2014 թվականի վերջին արժույթի կտրուկ տատանումների պատճառով, նախ՝ դրամի հանդեպ դոլարի, այնուհետեւ՝ դոլարի հանդեպ ռուսական ռուբլու, 12-ամսյա գնաճը գերազանցեց սպասելիքները՝ տարեվերջին կազմելով 4.6%:
Նոյեմբերի վերջից բարձրացվեց գրավատների ռեպոն՝ 8.25%-ից մինչեւ 21.0%-ի: Դեկտեմբերի կեսերին բարձրացվեց արժութային միջոցների ներգրավման պարտադիր պահուստավորումը՝ 12-ից հասնելով 24%-ի:
Իսկ 2015 թվականի ընթացքում ԿԲ-ն շարունակեց նվազեցնել գրավատների ռեպոն՝ այն հասցնելով 14.5%-ի, ինչը հանգեցրեց շուկայում դրամով կարճաժամկետ դրույքաչափերի նվազեցմանը:
Միաժամանակ, ապագա գնաճային սպասելիքները մեղմացնելու եւ դրանք նպատակային ցուցանիշին մոտեցնելու համար դեկտեմբերի վերջին ԿԲ-ն վերաֆինանսավորման դրույքաչափը բարձրացրել է 1.75 տոկոսային կետով:
Այս գործընթացը շարունակվել է նաեւ 2015 թվականի սկզբին, դրույքաչափը բարձրացել է 10.5%-ի: