Մոլդովայի քննչական ծառայությունը Հետաքննությունների դաշնային բյուրոյի հետ համատեղ 5 տարվա ընթացքում կանխել է «Իսլամական պետության» գրոհայինների կողմից սեւ շուկայում միջուկային հումք վաճառելու 4 փորձ։ Ենթադրվում է, որ ռադիոակտիվ հումքը արտահանվել է Ռուսաստանից, հայտնում է Associated Press-ը՝ վկայակոչելով հետաքննության բոլոր դրվագներին մասնակցած քննիչ Կոնստանտին Մալիկին։

Վերջին գործողությունն իրականացվել էր 2015թ. փետրվարին։ Ռադիոակտիվ ցեզիում-137-ը հայտնաբերել էին թաքստոցում։

2011թ. չարագործները փորձել էին ռադիոակտիվ ուրանի խմբաքանակ վաճառել Սուդանին։ Միջնորդին ձերբակալել էին հանցանքի պահին՝ 10 գրամ ուրան վաճառելիս։ Մերձավոր Արեւելքում ԻՊ գործունեության ակտիվանալու կապակցությամբ օպերատիվ մարմինները չեն կարող երաշխավորել, որ միջուկային հումքը սեւ շուկա դուրս բերելու ուղիները փակ են, մեջբերում է Lenta.ru-ն։

Գործակալությունը նշում է, որ այդ գործը վարող քննիչների խումբը ցրվել է Մոլդովայում քաղաքական ճգնաժամի ֆոնին, գրում է «ՌԻԱ Նովոստի»-ն։