Զիմբաբվեի այգիներում որսագողերը ցիանիդով 14 փիղ են թունավորել, հաղորդում է Lenta-ն՝ վկայակոչելով Reuters-ին։ Սպանված կենդանիներից վեցի ժանիքները սղոցել են։
Սեպտեմբերի 26-ին Հվանգի ազգային պարկում վեց փղի դիակ է հայտնաբերվել, իսկ հոկտեմբերի երկուսին՝ եւս 5 սպանված փիղ են գտել։ Բացի այդ, 3 փղի էլ թունավորել են Մատուսադոնի ազգային պարկում։ Ազգային պարկերի մամուլի քարտուղար Քերոլայն Վաշայա Մոյոն նշել է, որ բոլոր դեպքերում թույն է օգտագործվել։
Մասնագետներն ուսումնասիրել են մեռած կենդանիների երիկամներն ու լյարդը։ Նրանք այն եզրակացության են հանգել, որ որսագողերը ցիանիդ են լցրել այն նարինջների մեջ, որոնցով կերակրել են փղերին։ «Այս գործով առայժմ ձերբակալվածներ չկան։ Հետաքննությունը շարունակվում է», - հավելել է Վաշայա-Մոյոն։
