Հայաստանի կառավարությունը պատրաստվում է նախկինում նախատեսվածից ավելի փոքր հզորությամբ նոր ԱԷԿ կառուցել։ Այդ մասին հոկտեմբերի 7-ին լրագրողներին հայտնել է Հայաստանի էներգետիկայի նախարար Երվանդ Զախարյանը՝ ռուսական «Ռոսատոմ» պետական կորպորացիայի ղեկավար Սերգեյ Կիրիենկոյի հետ համատեղ բրիֆինգի ընթացքում։
Նա հավելել է, որ դեռ ժամանակ կա, մինչեւ կառուցումը սկսելը եւ առաջիկա տարիներին բուն շինարարության վերաբերյալ նոր լուրջ ուսումնասիրություններ չեն կատարվի։
Սակայն կուսումնասիրվի այն հարցը, թե ԱԷԿ-ն ինչ հզորությամբ պիտի կառուցվի, ասել է նա։ Ավելի վաղ նախատեսվում էր, որ նոր կայանը մինչեւ հազար մեգավատտ հզորություն կունենա։ Այնուամենայնիվ, նման հզորությունը հավանաբար ավելորդ է. 2016-36 թվերին Հայաստանի էներգետիկայի ոլորտի զարգացման ծրագրի համաձայն, նախատեսվում է գործարկել քամու էներգիայով աշխատող մինչեւ 200 մվտ հզորությամբ եւ հիդրոէներգիայով աշխատող 200-250 մվտ հզորությամբ կայաններ։