Չինաստանի Խենան նահանգում անդունդի վրայով անցնող ապակե կամուրջը ճաքել է զբոսաշրջիկների ոտքերի տակ: Ինչպես հայտնել է The Telegraph-ը, միջադեպը տեղի է ունեցել այն բանից հետո, երբ ճանապարհորդներից մեկի ձեռքից մետաղական բաժակ է ընկել կամուրջի վրա:
Ականատեսները հավաստիացնում են, որ վիբրացիաներ են զգացել են ու տեսել, որ իրենց ոտքերի տակ ապակին ճաքել է: Շատ զբոսաշրջիկներ սկսել են բղավելով փախչել կամուրջից, որը գետնից գրեթե մեկ կիլոմետր բարձրության վրա է, հայտնում է Lenta-ն:
Տեղական իշխանությունները տարածել են հայտարարություն, որտեղ պարզաբանել են, որ ճամփորդներին ոչինչ չէր սպառնում, քանի որ վնասվել էր ապակու երեք շերտերից միայն մեկը: Միջադեպից հետո կամուրջը փակվել է զբոսաշրջիկների համար:
Երկու կիրճերը իրար միացնող կամուրջի երկարությունը երեք հարյուր մետր է: Այն բացվել է սեպտեմբերի 20-ին: Կամուրջը կառուցվել է 24 միլիմետրանոց ապակուց: Կառույցի հեղինակները նաեւ հավաստիացնում էին, որ ապակին այնքան ամուր է, որ կարող է դիմանալ քառակուսի մետրի վրա 800 կգ ծանրությանը:
