Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանի որոշմամբ` դերասան Վարդան Պետրոսյանի գույքի վրա կալանք կդրվի: Այս մասին NEWS.am-ի հետ զրույցում ասաց դերասանի փաստաբան Նիկոլայ Բաղդասարյանը` նշելով, որ դատավորը մասնակիորեն բավարարել է քաղհայց ներկայացրած Հակոբյանների ներկայացուցչի միջնորդությունը։
Վարդան Պետրոսյանի մասնակցությամբ ավտովթարից տուժած Հակոբյանները քաղհայց են ներկայացրել, որով 3 մլն 400 հազար դրամի չափով գումար են պահանջում որպես հանցագործությամբ պատճառված վնասի փոխհատուցում՝ գործով տուժող Տաթեւիկ Հակոբյանի բուժման եւ փաստաբանի վարձավճարի համար։
Նիկոլայ Բաղդասարյանը նշեց, որ փոխհատուցումը Հակոբյանները պետք է ապահովագրական ընկերությունից պահանջեն, ոչ թե Վարդան Պետրոսյանից:
«Հայցվորները պետք է դիմում ներկայացնեն ապահովագրական ընկերություն, փոխարենը մենք են ներկայացրել: Այժմ ընկերությունը հաշվարկներ է իրականացնում, պարզում է` փոխհատուցման չափը խելամիտ է, թե ոչ: Ապահովագրական ընկերությունը պատրաստ է փոխհատուցել, եւ ըստ օրենքի էլ պետք է փոխհատուցի»,-ասաց փաստաբանը:
Նշենք, որ այսօր դատական նիստը հետաձգվեց: Հաջորդ նիստը կկայանա հոկտեմբերի 21-ին:
Հիշեցնենք, որ դերասան Վարդան Պետրոսյանն այժմ պատիժը կկրի բաց ռեժիմով, ինչը ենթադրում է, որ առավոտյան ժամը 8-ից դուրս է գալու ՔԿՀ–ից եւ մինչեւ 20:00–ն պետք է կրկին ներսում լինի: Այդ ընթացքում դերասանը երկրի ներսում ազատ տեղաշարժման իրավունք է ունենալու, իսկ հանգստյան օրերին պետք է լինի կալանավայրում:
Ավելի վաղ հայտնել էինք, որ 2013թ. հոկտեմբերի 20-ին Եղվարդ-Երեւան մայրուղու 32-րդ կմ-ում երկու ավտոմեքենա իրար էին բախվել: Պատահարի հետեւանքով 7 մարդ մարմնական վնասվածքներով տեղափոխվել էր հիվանդանոց, այդ թվում՝ դերասան Վարդան Պետրոսյանը: Ավելի ուշ Էդգար եւ Էդուարդ Հակոբյան եղբայրները մահացել էին: Վարդան Պետրոսյանը դատապարտվել էր 5 տարվա ազատազրկման, որից երեք տարին պատիժը կկրի բաց ռեժիմով: