Reuters լրատվական գործակալության նախկին խմբագիրը մեղավոր է ճանաչվել Los Angeles Times ամերիկյան թերթի ինտերնետ կայքը կոտրելու նպատակով Anonymous ցանցահենային խմբավորման հետ համագործակցելու համար։ Նման վճիռ է կայացրել Քալիֆորնիայի նահանգի Սակրամենտո քաղաքի դաշնային դատարանը։
Հետաքննության տվյալների համաձայն՝ 28-ամյա Մեթյու Քիսը, որը 2010թ. աշխատում էր Los Angeles Times-ին պատկանող The Tribune Company ընկերությունում, եւ որտեղից ի վերջո հեռացվել էր, Anonymous-ին էր տրամադրել ընկերության ծառայողական հաշիվներն ու դրանց ծածկագրերը։ Դատախազությունը նշել է, որ Քիսը առաջնորդվել է վրեժի զգացումով։ Ծածկագրերը ստանալուց հետո ցանցահենները կոտրել էին Los Angeles Times-ի ինտերնետ կայքը՝ փոփոխություններ կատարելով նորությունների մեջ։ The Tribune Company-ից հայտնել են, որ ընկերությանը հասցվել է 18 հազար դոլարի վնաս։
Ավելի ուշ Քիսը աշխատանքի էր ընդունվել Reuters գործակալությունում որպես խմբագիր, սակայն 2013թ., երբ բացահայտվել էր նրա հանցանքը, հեռացվել էր աշխատանքից։
Քիսի վերջնական դատավճիռը կհրապարակվի հունվարին։ Նրան կարող է սպառնալ մինչեւ 10 տարվա ազատազրկում, գրում է ՏԱՍՍ-ը։