ՌԴ ԶՈւ Գլխավոր շտաբի գնահատմամբ՝ Աֆղանստանի տարածքում ներկայումս կա «Իսլամական պետության» 2-3 հազար գրոհային։ Այս մասին հայտնում է ՏԱՍՍ-ը՝ վկայակոչելով Գլխավոր շտաբի պետ Վալերի Գերասիմովի հայտարարությունը։
Գեներալը նշել է, որ ԻՊ զինյալների ակտիվությունը վերջին մեկ տարվա ընթացքում աճել է, նրանք ավելի ու ավելի շատ տարածքներ են վերցնում իրենց հսկողության տակ։
«Ծայրահեղ արմատականների դիվերսիոն-ահաբեկչական գործունեության հետեւանքով այս տարի Աֆղանստանի քաղաքացիների շրջանում զոհերի թիվը 25 տոկոսով աճել է եւ կազմել 3.5 հազար մարդ։ Մոտ 7 հազար մարդ էլ վիրավորվել է»,- նշել է Գերասիմովը։
Նա նաեւ հայտնել է, որ Գլխավոր շտաբի հաշվարկներով՝ գրոհայինների ընդհանուր թիվը կազմում է 40-50 հազար մարդ։
