ՆԱՏՕ-ն պատրաստ է զորք ուղարկել Թուրքիա՝ իրենց դաշնակցին օգնելու՝ պաշտպանել իր երկրի օդային սահմանը ռուսական ինքնաթիռների խախտումներից։ Այս մասին հայտարարել է ՆԱՏՕ-ի գլխավոր քարտուղար Յենս Սթոլթենբերգը:
«ՆԱՏՕ-ն պատրաստ է եւ ի վիճակի է իր բոլոր դաշնակիցներին, այդ թվում նաեւ՝ Թուրքիային պաշտպանել ցանկացած սպառնալիքից, ՆԱՏՕ-ն պատրաստ է ուժեր տեղակայել հարավում, այդ թվում նաեւ՝ Թուրքիայում»,-ասել է Սթոլթենբերգը, հաղորդում է Reuters-ը։
Ավելի վաղ՝ չորեքշաբթի օրը Թուրքիայի նախագահ Ռեջեփ Թայիփ Էրդողանը հայտնել է, որ Անկարան սպառնում է հրաժարվել ռուսական գազի գնումներից՝ ռուսական ինքնաթիռների կողմից այդ երկրի օդային տարածքի խախտման միջադեպերի պատճառով։
Թուրքիայի եւ ՆԱՏՕ-ի օդային տարածքի խախտման վերաբերյալ Ռուսաստանի տված նախորդ բացատրությունները չեն բավարարել Թուրքիային. Էրդողանը դրանք «անհամոզիչ» է անվանել, փոխանցում է Gazeta-ն։
