Հաջորդ շաբաթ Լյուքսերբուրգում Եվրամիության մակարդակով, միության անդամ-պետությունների ԱԳ նախարարների հանդիպման ընթացքում, բանակցությունների մանդատ կընդունվի՝ Հայաստանի եւ Եվրամիության միջեւ հատուկ համաձայնագրի կնքման նպատակով: Այս մասին NEWS.am-ի թղթակցի հետ զրույցում հայտարարեց Ֆրանսիայի եվրոպական հարցերի պետքարտուղար Առլեմ Դեզիրը, որը Երեւան է ժամանել՝ մասնակցելու Ֆրանկոֆոնիայի միջազգային կազմակերպության երկրների ԱԳՆ ղեկավարների ֆորումի 31-րդ նստաշրջանին:
Անդրադառնալով Հայաստանի ու Եվրամիության հարաբերությունների զարգացման հեռանկարներին, հաշվի առնելով Եվրասիական տնտեսական միությանը մեր երկրի անդամակցությունը, ֆրանսիացի նախարարը նշեց. «Դա կլինի գլխավոր թեմաներից մեկը, որը պատրաստվում ենք քննարկել Երեւանում: Ինչպես գիտեք, Ֆրանսիան սատարում է փաստը, որ Հայաստանը կարող է բանակցություններ վարել Եվրամիության հետ՝ հատուկ համաձայնագիր ստորագրելու նպատակով, նույնիսկ Ռուսաստանի հետ ԵՏՄ մաս կազմելու որոշման պարագայում: Մենք հարգում ենք այդ ընտրությունը».:
Առլեմ Դեզիրի խոսքով, Երեւանում իր գործընկերոջ հետ քննարկելու է համագործակցության ոլորտները, որոնցում հարաբերությունները զարգացնելու ցանկություն կա: «Ոչ միայն տնտեսական եւ առեւտրի ոլորտում, այլեւ քաղաքական, մշակութային փոխգործակցության: Կարծում եմ՝ ներկայում հեռանկարները միանգամայն հստակ են, եւ մենք հաջորդ շաբաթ կբացենք Հայաստանի եւ Եվրամիության հարաբերությունների պատմության մեջ այդ նոր փուլը»,- ամփոփեց Ֆրանսիայի եվրոպական հարցերի պետքարտուղարը:
Հիշեցնենք, որ 2013 թվականի նոյեմբերի 28-29-ը Վիլնյուսում անցկացված ԵՄ «Արեւելյան գործընկերության» գագաթաժողովում Հայաստանը չստորագրեց Ասոցացման մասին համաձայնագիրը, քանի որ նույն տարվա սեպտեմբերի 3-ին հայտարարեց Մաքսային, այնուհետեւ՝ Եվրասիական տնտեսական միությանն անդամակցելու որոշման մասին: Ներկայում Հայաստանը պետք է ԵՄ-ի հետ բանակցություններ սկսի նոր փաստաթղթի շուրջ՝ հաշվի առնելով ԵՏՄ-ի շրջանակում Հայաստանի ստանձնած պարտավորությունները:
