Յունիբանկը մոտեցնում է բանկը հաճախորդներին` հնարավորություն տալով նրանց դառնալ բաժնետեր: Այս մասին նշել է Յունիբանկի Խորհրդի անդամ Արարատ Ղուկասյանը:
Նրա խոսքով, 2014-2015թթ.-ին Յունիբանկն էապես ընդլայնեց համագործակցությունը միջազգային կառույցների հետ: Վարկավորման ծրագրի շրջանակներում ներկայումս բանկը համագործակցում է Միջազգային ֆինանսական կորպորացիայի (IFC), Առեւտրի եւ զարգացման Սեւծովյան բանկի (BSTDB) եւ Եվրոպական ներդրումային բանկի (EIB) հետ: Համագործակցության պայմանագրերի շրջանակներում ներգրավված միջոցները Յունիբանկն ուղղում է փոքր եւ միջին ձեռնարկատիրության երկարաժամկետ վարկավորմանը` նպատակ ունենալով դառնալու առավել շահավետ գործընկեր ՓՄՁ-ների համար:
«Յունիբանկը թեւակոխում է զարգացման որակապես նոր փուլ, որը ենթադրում է ինչպես կառավարման հիմքում կորպորատիվ մոտեցումների խորացում, աշխատակազմի արդյունավետության բարձրացման պահանջ, այնպես էլ` համագործակցության ընդլայնում միջազգային ֆինանսական կազմակերպությունների հետ: Այս քայլերը համահունչ են Յունիբանկի` ժողովրդական բանկ դառնալու ռազմավարությանը, որի անկյունաքարը շահառուների ընդլանումն է բաժնետոմսերի առաջնային տեղաբաշխման միջոցով» - ընդգծել է Արարատ Ղուկասյանը:
Երկարաժամկետ միջոցներ ներգրավելու նպատակով, Յունիբանկը բանակցություններ է վարում նաեւ եվրոպական մասնավոր ֆոնդերի հետ: Ա.Ղուկասյանի խոսքով, շուտով բանկը կհայտարարի եւս մեկ համագործակցության պայմանագրի ստորագրման մասին: «Մենք բոլորս քաջ գիտակցում ենք ՓՄՁ-ների կարեւոր դերը տնտեսության դիվերսիֆիկացիայի եւ նոր աշխատատեղերի ստեղծման մեջ, ուստի ներգրավված միջոցներն ուղղվելու են ՓՄՁ վարկավորման ընդլայնմանը` էականորեն բարձրացնելով վարկային միջոցների հասանելիության մակարդակը», - նշեց Ա.Ղուկասյանը:
Միջազգային կազմակերպությունների հետ համագործակցությունը բանկը դիտում է ոչ միայն որպես ֆինանսական միջոցների ներգրավման, այլեւ միջազգային փորձի ձեռքբերման, խորհրդատվության մատուցման եւ զարգացման նոր հեռանկարների ստեղծման հնարավորություն: Բաժնետոմսերի առաջնային տեղաբաշխման` IPO-ի միջոցով ներգրավված միջոցները Յունիբանկը եւս ուղղելու է իր գործունեության հիմնական ռազմավարական ուղղությունների` մանրածախ բիզնեսի հետագա զարգացմանը եւ ՓՄՁ-ների հետ աշխատանքի ընդլայնմանը:
«Յունիբանկն առաջին անգամ Հայաստանում իրականացնում է բաժնետոմսերի թողարկում բորսայի միջոցով: Այս քալով մենք մոտեցնում ենք բանկը հաճախորդներին, վերջիններիս հնարավորություն ընձեռելով դառնալու բաժնետեր: Դատելով արդեն իսկ ձեւավորված պահանջարկից, տեղական շուկայի արձագանքը ներդրումային այս նոր գործիքի նկատմամբ դրական է, որը միանշանակ փաստում է բանկի կայուն ֆինանսական վիճակի, մեր հաճախորդների եւ ներդրողների բանկի նկատմամբ ունեցած վստահության մասին», - հավելեց Ա.Ղուկասյանը:
Այսօր Յունիբանկը ներկայացված է գլխամասային գրասենյակով եւ 45 մասնաճյուղերով Հայաստանում եւ ԼՂՀ-ում: Մոսկվայում (ՌԴ) գործում է բանկի ներկայացուցչությունը: 30.06.2015թ.-ի դրությամբ բանկի ակտիվները կազմել են 165 մլրդ ՀՀ դրամ, ընդհանուր կապիտալը` 20,8 մլրդ ՀՀ դրամ, վարկային ներդրումները` 109 մլրդ ՀՀ դրամ, պարտավորությունները` 144 մլրդ ՀՀ դրամ: Յունիբանկում սպասարկվող հաճախորդների թիվը գերազանցում է 274 000-ը:
