Ղազախստանի նախագահ Նուրսուլթան Նազարբաեւը ու Ուկրաինայի նախագահ Պյոտր Պորոշենկոն Ասթանայում՝ ղազախաուկրաինական բիզնես ֆորումի ընթացքում պայմանավորվել են ընդլայնել տնտեսական համագործակցությունը, հաղորդում է «Նովոստի-Ղազախստանը»:
«Այսօր մենք պետք է շարունակենք տնտեսական կապերը, որոնցից երկու կողմերն էլ կշահեն: Ինչպես ինձ ասել են՝ մի քանի հռչակագրեր են ստորագրվել, հեռանկարային շատ նախագծերի շուրջ ակտիվ բանակցություններ են ընթանում: Իհարկե այսօր տրանսպորտային խնդիրներ կան, Ուկրաինայի ու Ռուսաստանի միջեւ հակամարտության եւ պատժամիջոցների խնդիրը կա, բայց կա նաև նույնիսկ նման բարդ պայմաններում աշխատելու, իրար հասկանալու ու աջակցելու ցանկություն: Չնայած համաշխարհային տնտեսության անկայունությանն ու անկանխատեսելիությանը՝ մենք կարող ենք միասին կառուցել մեր ապագա համատեղ ծրագրերը»,- հայտարարել է Նազարբաեւը Պյոտր Պորոշենկոյի հետ հանդիպման ժամանակ:
Միաժամանակ Ղազախստանի նախագահը նշել է, որ եկրների միջեւ ապրանքաշրջանառությունը գրեթե կրկնակի նվազել է՝ 5.3 միլիարդից հասնելով 2.2 մլրդ-ի:
«Այս հարցում շատ օբյեկտիվ պատճառներ կան, որոնց մասին մենք գիտենք, բայց մենք հիմա ունենք շատ պոտենցիալ հնարավորություններ, որոնց միջոցով կարող ենք շտկել այս իրավիճակը»,- նշել է Նազարբաեւը: