Առողջապահության նախարարությունը դեռեւս քննչական մարմնին չի փոխանցել Երեւանի «Շենգավիթ» ԲԿ-ից հուլիսի 27-ին ծայրահեղ ծանր վիճակում «Էրեբունի» ԲԿ տեղափոխված եւ երկու օր անց մահացած ծննդկան Մերի Մարգարյանի գործով կատարված ներքին քննության արդյունքները: NEWS.am-ի թղթակցի հետ զրույցում նման հարցադրում արեց տուժողի իրավահաջորդի ներկայացուցիչ Մարինա Թովմասյանը:
«Առողջապահության նախարարությունն իր իրականացրած ներքին քննության արդյունքները պետք է փոխանցեր գործով քննիչին, որն էլ մեզ նույնպես պետք է հայտներ արդյունքների մասին: Մեր տեղեկություններով` արդյունքները դեռ սեպտեմբերի վերջին պատրաստ են եղել, սակայն անհայտ պատճառներով նախարարությունը եզրակացություն չի փոխանցում քննչական մարմնին: Այս փաստը մեզ շատ է մտահոգում, քանի որ քննության արդյունքները կարող են ելակետային լինել գործի համար»,- ասաց Մարինա Թովմասյանը:
Նրա խոսքով` քննիչը գրավոր դիմել է նախարարությանը` արդյունքները ստանալու համար, սակայն դեռեւս պատասխան չկա:
Առողջապահության նախարարությունից էլ մեզ հայտնեցին, որ նախարարի հրամանով ստեղծվել է մասնագիտական հանձնաժողով, որի եզրակացությունը դեռ պատրաստ չէ, քանի որ դատաբժշկական փորձաքննության պատասխանը դեռ չունեին։
«Քննչական մարմինն արդեն ուղարկել է պատասխանը, գործընթացը շարունակվում է։ Այս պահին պատճառների կամ սխալների մասին չենք կարող ասել»,- ասացին նախարարությունից:
Նշենք, որ առողջապահության նախարարությունը բոլոր դեպքերով ներքին քննություն է իրականացնում, որոնց արդյունքները չեն հրապարակվում:
Հիշեցնենք, որ Մերի Մարգարյանի հարազատները կատարվածի մեջ մեղադրում են հենց «Շենգավիթ» բժշկական կենտրոնի բժշկուհի Շուշանիկ Բախշյանին, ում մոտ էլ հաշվառված է եղել եւ 35 շաբաթ հետազոտվել է 26-ամյա կինը: Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Միայն 2015թ. հուլիսի 26-ին են նրան հիվանդանոց ընդունել, սակայն հաջորդ օրն արդեն իսկ խորհուրդ են տվել տեղափոխել այլ հիվանդանոց: Հարազատները տեղափոխել են «Էրեբունի» ԲԿ, որտեղ նրան անմիջապես կեսարյան հատում են արել: Մերիի վիճակը ծայրահեղ ծանր է եղել, հուլիսի 29-ին նա մահացել է: Հուլիսի 30-ին կեսօրին մահացել է նաեւ ծննդկանի նորածին դուստրը:
Դեպքի առթիվ օգոստոսի 3-ին հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասի հատկանիշներով: Ըստ Քննչական կոմիտեի տարածած հաղորդագրության՝ «Շենգավիթ» ԲԿ-ի բժշկուհի Շուշանիկ Բախշյանը ցուցաբերել է անբարեխիղճ վերաբերմունք, ինչի հետեւանքով հղիության 35-րդ շաբաթում գտնվող Մերի Մարգարյանը մահացել է։ Գործով մեղադրյալ դեռեւս չկա: