Լիտվան հույս ունի, որ Հայաստանի ու Եվրամիության միջեւ նոր համաձայնագիրն ինչպես քաղաքական, այնպես էլ տնտեսական ուղղությամբ ավելի հեռուն կգնա՝ ավելի բարենպաստ պայմաններ ստեղծելով բոլոր մակարդակներում եւ ոլորտներում փոխգործակցության համար: NEWS.am-ի թղթակցի հետ զրույցում Լիտվայի ԱԳ փոխնախարար Անդրիուս Կրիվասն ընդգծեց Ֆրանկոֆոնիայի միջազգային կազմակերպության աշխատանքի կարեւորագույն ուղղությունները, ինչպես նաեւ անդրադարձավ ապագա համաձայնագրին՝ ուղղված Հայաստան-Եվրամիություն համագործակցության նոր իրավական շրջանակների սահմանմանը:

Պարոն Կրիվաս, ինչպիսի միջոցառումներ եւ հանդիպումներ եք ծրագրել Ֆրանկոֆոնիայի միջազգային կազմակերպության անդամ-պետությունների ԱԳ նախարարների 31-րդ համաժողովի շրջանակում:

Թույլ տվեք սկսել նրանից, որ մենք բարձր ենք գնահատում Ֆրանկոֆոնիայի միջազգային կազմակերպության նախարարական հերթական համաժողովը Երեւանում ընդունելու՝ Հայաստանի կառավարության նախաձեռնությունը: Լիտվան այս կազմակերպությունում դիտորդ է: Եվ մեզ համար Ֆրանկոֆոնիան շատ կարեւոր աշխատանքային ուղղություն է, որը մեզ համար ոչ միայն լեզվաբանական ուղղություն ունի (գաղտնիք չէ, որ Լիտվան ֆրանկոֆոն երկիր չէ):

Մենք մեծ նշանակություն ենք տալիս այս կազմակերպության աշխատանքի այն ուղղություններին, ինչպիսիք են մշակութային, մարդասիրական եւ զարգացման ուղղությունները: Եվ ինձ համար պարզապես եզակի հնարավորություն է այսօր այստեղ՝ հայկական հյուրընկալ հողում գտնվելը, եւ մեծ անհամբերությամբ եմ սպասում համաժողովին: Ես պարզապես չէի կարող բաց թողնել Հայաստանում գործընկերներիս հետ հանդիպելու հնարավորությունը: Շնորհակալ եմ իմ հայ գործընկերներին, որ երկկողմ շփումների եւ քաղաքական խորհրդակցությունների շարք կունենամ:

Ֆրանսիայի եվրոպական հարցերի պետքարտուղարը հայտարարեց, որ արդեն հաջորդ շաբաթ Եվրամիության ԱԳ նախարարները բանակցությունների մեկնարկի մանդատ կընդունեն՝ նպատակ ունենալով Հայաստանի եւ Եվրամիության միջեւ նոր փաստաթուղթ ընդունել: Ձեր կարծիքով, համագործակցության հետագա զարգացման ի՞նչ հեռանկարներ կան:

Մենք մեր կողմից, որպես Եվրամիության անդամ-պետություն, սատարել եւ սատարում ենք այդպիսի փաստաթղթի մշակման շուրջ աշխատանքը: Դուք, իհարկե, տեղյակ եք, որ Լիտվան երկու տարի առաջ Եվրամիության Խորհրդի նախագահողն էր: Եվ մեր նախագահության առաջնահերթություններից մեկն էլ ԵՄ «Արեւելյան գործընկերության» շրջանակում աշխատանքներն առաջ տանելն էր. ծրագիր, որի ակտիվ մասնակիցներից է Հայաստանը: Այն ժամանակ մենք աշխատում էինք Ասոցացման մասին համաձայնագրի ստորագրման ուղղությամբ:

Տարբեր հանգամանքների եւ պատճառների բերումով Հայաստանն այլ ուղի ընտրեց, սակայն Ասոցացման մասին համաձայնագրի շուրջ աշխատանքն իզուր չանցավ: Ե՛վ Եվրամիությունը, ե՛ւ Հայաստանը փոխադարձ հետաքրքրություն ունեն տարբեր ոլորտներում համագործակցության զարգացման հարցում: Այդ համագործակցության մի մասը կենտրոնացած է բազմակողմ շրջանակում. Եվրամիություն՝ գումարած «Արեւելյան գործընկերության» բոլոր 6 պետությունները կամ նրանց մի մասը, իսկ այդ համագործակցության մյուս մասը վերաբերում է Հայաստան-Եվրամիություն երկկողմ հարաբերություններին:

Մենք սատարում էինք այն, ինչը ԵՄ-ն կոչում է «scoping exercise». ըստ էության, ԵՄ-ի եւ Հայաստանի միջեւ փոխգործակցության խորացման հնարավորության ուսումնասիրություն՝ առանց կողմերի միջազգային այլ պարտավորություններին վնաս հասցնելու: Իրավական համաձայնագրի ստորագրման նախապատրաստումն այդ ջանքերի շարունակությունն է:

Կարծում ենք՝ Հայաստանը եվրոպական երկիր է եւ եվրոպական ապագա ունի: Եվ այն համալիր միջազգային խնդիրները, որոնց այսօր Հայաստանը բախվում է, կլուծվեն համաշխարհային եւ եվրոպական հանրության համատեղ ջանքերով: Լիտվան, որպես ԵՄ անդամ-պետություն, վճռական է դրանում ակտիվ մասնակցություն ունենալու հարցում:

Զրուցեց Տաթեւիկ Ղազարյանը