ԱՄՆ-ում դպրոցական ուսուցչուհուն տասը տարվա ազատազրկման են դատապարտել աշակերտների հետ սեռական հարաբերությունների համար։

Դատարանը հաստատել է, որ 25 -ամյա Ռեյչել Բաուերը, որը դասավանդում էր Տեքսաս նահանգի Ֆրանքսթոն քաղաքի դպրոցում, իր ինտիմ լուսանկարներն էր ուղարկում աշակերտներին։ Բացի դրանից, ինչպես հետեւում է դատավճռից, Բաուերը սեռական կապի է ունեցել իր աշակերտներից մեկի հետ։

Ուսուցչուհուն նաեւ մեղավոր են ճանաչել անչափահասների նկատմամբ սեռական բռնության համար ու դատապարտել տասը տարվա պայմանական ազատազրկման։ Պատժի այս մասը Բաուերը կրելու է արդեն բանտից դուրս գալուց հետո։ Ինքը Բաուերը խոստովանել է իր մեղքը, հայտնելով, որ սեռական կապ է ունեցել իր աշակերտներից երեքի՝ 14,16 ու 17 տարեկան տղաների հետ, հայտնում է BBC-ի Ռուսական ծառայությունը։

Հուլիսի սկզբին կայացվել էր դատավճիռ մեկ այլ ամերիկյան ուսուցչուհու գործով, որի շուրջ մեծ աղմուկ էր բարձրացել. 30 ամյա Ջենիֆեր Ֆիխթերը՝ Ֆլորիդայից, 22 տարվա ազատազրկման էր դատապարտվել աշակերտների հետ սեքսի համար։

Ֆիխթերին ձերբակալել էին այն բանից հետո, երբ աշակերտներից մեկի մայրը որդու հեռախոսում ուսուցչուհու սիրային հաղորդագրություններն էր հայտնաբերել։

Սրանք անչափահասներին գայթակղելու համար ուսուցիչներին վերաբերող  առաջին դատավճիռները չեն։ 2005 թ. Ֆլորիդայի ուսուցչուհի Դեբրա Լաֆավը երեք տարվա տնային կալանքի եւ յոթ տարվա փորձաժամկետի էր դատապարտվել՝ 14 ամյա երիտասարդին գայթակղելու համար։