Լատվիայում սկսվել են «Դետոնատոր-2015» զորավարժությունները, որոնց ընթացքում Ցեկուլի զինամթերքի նախկին պահեստների տարածքները մաքրվելու են պայթյունավտանգ առարկաներից։ Այս տարի դրանք առաջին անգամ են ստացել ՆԱՏՕ-ի զորավարժությունների կարգավիճակ, այս մասին «ՏԱՍՍ»-ի հետ զրույցում պատմել է Լատվիայի Պաշտպանության նախարարության մամուլի ծառայության ղեկավար Անետե Գնեզեն։
«Զորավարժություններին առաջին անգամ մասնակցելու են զինծառայողներ յոթ երկրներից՝ Լատվիայից, Դանիայից, Էստոնիայից, Լիտվայից, Լյուքսեմբուրգից, Գերմանիայից ու Շվեդիայից»,- ասել է նա։ Զորավարժություններն անցնելու են հոկտեմբերի 10-29-ը, դրանց մասնակցելու են ավելի քան 130 զինծառայողներ։
«Դետոնատոր» զորավարժությունները հաստատում են տարածաշրջանում մեր դաշնակիցների ներկայությունը ու համագործակցությունը բոլոր, այդ թվում ինժեներատեխնիկական ուղղություններով»,- հայտարարել է Լատվիայի ազգային զինված ուժերի հրամանատար Ռայմոնդս Գրաուբեն։
Ցեկուլում զինամթերքի պահեստները 1920 թ. սկսած օգտագործում էր Լատվիայի բանակը, երկրորդ համաշխարհային պատերազմի տարիներին՝ Գերմանիան, հետո՝ խորհրդային բանակը։ Պոլիգոնը փակվել էր 1995 թ.։ «Դետոնատոր» զորավարժությունների շրջանակում ամեն տարի այստեղ հայտնաբերվում ու ոչնչացվում է ավելի քան հազար պայթյունավտանգ առարկա, պատմեց Գնեզեն։
