Հոկտեմբերի 10-ին, ժամը 19.28-ին ահազանգ է ստացվել, որ Երեւանի Արցախի պողոտայում՝ «Տուն Դեպո» առեւտրի կենտրոնի մոտակայքում, տեղի է ունեցել ՃՏՊ. ավտոմեքենան բախվել է երթուղային ավտոբուսին, կա տուժած. անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ:

Պարզվել է, որ դեռեւս չբացահայտված հանգամանքներում բախվել են թիվ 39 երթուղին սպասարկող «Հունդայի» մակնիշի 0133S պետհամարանիշով ավտոբուսը (վարորդ` 1965 թ. ծնված Ա. Կ.) եւ «ԳԱԶ-24» մակնիշի 404 LS 68 պետհամարանիշով ավտոմեքենան (վարորդ` 1972 թ. ծնված Մ. Պ.):

Մինչ հրշեջ-փրկարարների կանչի վայր հասնելը` «ԳԱԶ-24» մակնիշի ավտոմեքենայի վարորդը հոսպիտալացվել է «Էրեբունի» ԲԿ: Ավտոբուսի ուղեւորը` 1983 թ. ծնված Ս. Հ.-ը, հոսպիտալացվել է «Սուրբ Գրիգոր Լուսավորիչ» ԲԿ:

Բժիշկները Մ. Պ.-ի առողջական վիճակը գնահատել են ծանր, իսկ Ս. Հ.-ը, ստանալով համապատասխան բուժօգնություն, դուրս է գրվել:

Հրշեջ-փրկարարները հոսանքազրկել են ավտոմեքենաները եւ փակել «ԳԱԶ-24» մակնիշի ավտոմեքենայի գազի բալոնի փականը: