Արցախում սեպտեմբերի 25-ին հակառակորդի հրետակոծության հետեւանքով վիրավորված զինծառայողներից մի քանիսը բուժման երկրորդ փուլում կվիրահատվեն, քանի որ բեկորային վնասվածքներ ունեն: Այս մասին NEWS.am-ի հետ զրույցում ասաց ՀՀ ՊՆ կենտրոնական զինվորական կլինիկական հոսպիտալի փոխտնօրեն Արտաշես Խաչատրյանը:
«Միայն մեկ զինծառայող է մնացել Վերակենդանացման բաժնում, մնացածն արդեն հիվանդասենյակներում են: Նրանք դեռ կշարունակեն մնալ հիվանդասենյակներում, մի քանիսն էլ բուժման երկրորդ փուլում կվիրահատվեն, քանի որ բեկորային վնասվածքներ ունեն»,-ասաց նա:
Հիշեցնենք, որ Երեւան էին տեղափոխվել այն զինծառայողները, որոնց վիճակը կայուն ծանր էր:
Ավելի վաղ NEWS.am-ը հայտնել էր, որ սեպտեմբերի 25-ին ժամը 17:30-ի սահմանում, ադրբեջանական զինուժի կողմից թուրքական արտադրության TR-107 կայանքներից հրթիռահրետանային արկակոծման էր ենթարկվել ՊԲ-ի հյուսիս-արեւելյան ուղղությամբ տեղակայված զորամասերից մեկի պահպանության տեղամասը, ինչի հետեւանքով մահացու վիրավորվել էին ՊԲ զինծառայողներ Նորայր Միքայելի Խաչատրյանը (ծնված 1995թ.), Ռոբերտ Սուրենի Մկրտչյանը (ծնված 1995թ.), Հարութ Մաքսիմի Հակոբյանը (ծնված 1997թ.) եւ Կարեն Գեւորգի Շահինյանը (ծնված 1997թ.): Կա 16 վիրավոր:
Դեպքի առթիվ հարուցվել է քրեական գործ: