Հայաստանում ՏՏ ոլորտում առաջին քայլերն անող ընկերություններին` սթարթափներին, որոնք կներկայացնեն մրցունակ գաղափարներ, կտրվեն 10-15 հազարական ԱՄՆ դոլար: Այս մասին այսօր՝ հոկտեմբերի 12-ին, Հայաստանում բարձր տեխնոլոգիաների «ԱրմԹեք» գործարար համաժողովում, լրագրողների հետ զրույցում նշեց Ձեռնարկությունների ինկուբատոր հիմնադրամի նախագահ Բագրատ Ենգիբարյանը՝ հավելելով, որ այս ծրագիրն իրականացվում է համաժողովի շրջանակում կազմակերպված գիտության եւ տեխնոլոգիաների ձեռներեցության ծրագրի մրցույթի շրջանակում:
Հարցին, թե այդքան գումարը բավակա՞ն է ընկերություններին գործունեություն սկսելու համար, նա պատասխանեց. «Սա սկզբունքային հարց է եւ պետք չի ձեռներեցին փչացնել գումարներով: Դրա համար պետք է հասկանալ, թե ինչու համար ենք աջակցում։ Դրա համար մենք ունենք երկու հիմնական ծրագիր, առաջին՝ բոլորովին նորաստեղծներին աջակցելու, որոնց գաղափարները դեռ պետք է փորձարկվեն: Դրանից հետո գալիս են արդեն ձեւավորված կազմակերպությունները, որոնք գործում են առնվազն 3 տարի, եւ նրանց տրամադրում ենք մինչեւ 50 հազար դոլարի դրամաշնորհ: Առաջին դեքում դու փորձարկման փուլում ես, ունես չհաջողելու 90 տոկոս հավանականություն, որտեղ 15 հազար դոլարը բավական գումար է»:
Հարցին, թե 50 հազար դոլարի չափով դրամաշնորհ տրվե՞լ է որեւէ կազմակերպության, Ենգիբարյանը պատասխանեց. «50 հազար դոլարի չափով դրամաշնորհ արդեն տրվել է 30 հատ, որոնցից 16-ը Գյումրիի ու Վանաձորի համար: Գյումրիում արդեն տեխնոլոգիական կենտրոնը կա ու նրանք շատ ակտիվ են գործում: Այս ծրագիրը կշարունակվի»:
