Եվրասիական տնտեսական միության (ԵՏՄ) առաջնորդները մտադիր են Իսրայելի հետ Ազատ առեւտրի գոտի (ԱԱԳ) ստեղծել, ընդ որում այս պահին փորձագետներն ուսումնասիրում են Հնդկաստանի, Եգիպտոսի եւ Իրանի հետ աշխատելու հնարավորությունները։ Այդ մասին ասել է Ռուսաստանի նախագահի օգնական Յուրի Ուշակովը, տեղեկացնում է «ՌԻԱ Նովոստին»։
«Քանի որ արտասահմանցի գործընկերներն առաջվա նման հետաքրքրություն են դրսեւորում Եվրասիական Միության հետ համագործակցության վերաբերյալ, հիշեցնեմ, որ մայիսին Եվրասիական Միությունը համաձայնագիր է ստորագրել Վիետնամի հետ ազատ առեւտրի գոտի ստեղծելու մասին, կքննարկվի նաեւ Իսրայելի հետ նման բանակցությունների մեկնարկի հարցը։ Նշեմ նաեւ, որ փորձագիտական մակարդակում ուսումնասիրվում է Հնդկաստանի, Եգիպտոսի եւ Իրանի հետ ազատ առեւտրի գոտի ստեղծելու վերաբերյալ համաձայնագրեր կնքելու հարցը»,- պատմել է նա։
Ուշակովը նաեւ նշել է, որ ԵՏՄ-ի առաջնորդները մտադիր են խորացնել համագործակցությունը Չինաստանի հետ։