Ռուսաստանի հայերի միության (ՌՀՄ) համագումարը Լեռնային Ղարաբաղի իրադրության մասին բանաձեւ է ընդունել: Այս մասին NEWS.am-ի թղթակցի հետ զրույցում հայտարարեց ՌՀՄ փոխնախագահ Լեւոն Մանուկյանը՝ հավելելով, որ բանաձեւի տեքստը կհրապարակվի առաջիկայում:
Նա հիշեցրեց, որ հոկտեմբերի 10-11-ը Մոսկվայում կայացել է Ռուսաստանի հայերի միության 5-րդ համագումարը, որին Ռուսաստանի բոլոր շրջաններից ավելի քան 350 պատվիրակ է մասնակցել: «Համագումարի արդյունքում վերընտրվեց Ռուսաստանի հայերի միության Խորհուրդը: Նախկինում որոշվել էր Խորհրդի նախագահություն ձեւավորել: Համագումարի երկրորդ օրը միաձայն ՌՀՄ նախագահ վերընտրվեց Արա Արշավիրի Աբրահամյանը»,- նշեց Մանուկյանը՝ հավելելով, որ համագումարի ընթացքում Արա Աբրահամյանը մանրամասն պատմել է այն ծրագրերի մասին, որոնք իրականացվել են Հայաստանում, Լեռնային Ղարաբաղում եւ Ռուսաստանում:
«Քննարկվեց Ադրբեջանի կողմից Հայաստանի տարածքի գնդակոծության, ղարաբաղյան հակամարտության գոտում սադրանքների հետ կապված իրավիճակը: Որպես Ռուսաստանի քաղաքացի, որը Հայաստանի ռազմավարական դաշնակիցն է, մեզ նույնպես դա անհանգստացնում է: Այդ պատճառով, մենք եւս մեկ անգամ հայտարարությամբ դիմեցինք ադրբեջանական կողմին՝ կոչ անելով չխախտել համաձայնությունները, հակամարտության լուծումը չտանել ռազմական հարթություն, այլ հարցը լուծել բացառապես խաղաղ բանակցությունների միջոցով»,- ընդգծեց Լեւոն Մանուկյանը:
