Մոսկվայում ահաբեկչություն նախապատրաստելու կասկածանքով ձերբակալվածները Ռուսաստանի քաղաքացիներ են: Սակայն նրանցից ոմանք մարզվել են Սիրիայում «Իսլամական պետություն» ահաբեկչական խմբավորման ճամբարներում: ՆՏՎ հեռուստաալիքի փոխանցմամբ, այս մասին հաղորդել են ԱԴԾ հասարակայնության հետ կապերի վարչությունում:
Վարչության տեղեկացմամբ, կասկածյալների առաջին հարցաքննության ժամանակ պարզվել է, որ նրանք ցանկանում էին ահաբեկչություն իրականացնել մոսկովյան մետրոյում կամ օդանավակայանում: Դրա համար նրանք 5 կիլոգրամանոց ռումբ են պատրաստել ամոնիումի նիտրատի հիմքով, որը պատրաստվում էին գործի դնել բջջային հեռախոսի օգնությամբ:
Կասկածյալներին ձերբակալել են հոկտեմբերի 11-ին: Հատուկ գործողության ընթացքում շենքի 120 բնակչի տարհանել են, ինչպես նաեւ անջատել են գազը՝ հնարավոր պայթյունից խուսափելու համար:
Ահաբեկչության նախապատրաստման փաստի առիթով հարուցվել է քրեական գործ՝ Քրեական օրենսգրքի 3 հոդվածներով. «Ահաբեկչության նախապատրաստում», «Զենքի ապօրինի շրջանառություն» եւ «Պայթուցիկ նյութերի ապօրինի շրջանառություն»:
