Հայաստանը կարեւորում է ԵՄ խորհրդի կողմից Հայաստանի հետ հարաբերությունների նոր իրավական հիմքի ձեւավորման շուրջ բանակցություններ սկսելու վերաբերյալ Եվրոպական Հանձնաժողովին մանդատի տրամադրումը: Այս մասին հայտարարություն է տարածել Հայաստանի ԱԳ նախարար Էդվարդ Նալբանդյանը:

«Լիահույս ենք, որ բանակցությունների արդյունքում մշակված փաստաթուղթը լավագույնս կարտահայտի Հայաստան-Եվրոպական Միություն փոխշահավետ համագործակցության խորությունը, կարտացոլի հարաբերությունները նոր մակարդակի բարձրացնելու համատեղ հանձնառությունը ու կուրվագծի փոխադարձ հետաքրքրություն ներկայացնող բոլոր ոլորտներում համապարփակ փոխգործակցությունը»,-նշված է Նալբանդյանի հայտարարությունում:

Ավելի վաղ NEWS.am-ը հայտնել էր, որ ԵՄ Խորհուրդը լիազորել է Եվրահանձնաժողովին եւ Բարձր ներկայացուցչին բանակցություններ սկսել Հայաստանի հետ նոր, իրավաբանորեն պարտադիր եւ համընդգրկուն համաձայնագրի վերաբերյալ բանակցություններ սկսելու։ Որոշումը կայացվել է հոկտեմբերի 12-ին, Լյուքսեմբուրգում, արտգործնախարարների մակարդակով։

 NEWS.am-ի հարցմանն ի պատասխան ԵՄ արտաքին գործերի եւ համագործակցության դեպարտամենտի մամուլի ծառայության աշխատակից Վիրժինի Բատտու-Հենրիքսոնը նշել է, որ այդ համաձայնագիրը կփոխարինի ԵՄ եւ Հայաստանի միջեւ ներկայիս Գործընկերության եւ համագործակցության համաձայնագրին։