Windows 10-ի հետագա նորացումներից մեկից կհանվի «Կառավարման պանել» անունով բաժինը, որն առկա է այդ ընտանիքի օպերացիոն համակարգերում արդեն մոտ երեք տասնամյակ։ Այդ մասին հաղորդում է PC World-ը՝ վկայակոչելով ծրագրային արտադրանքի գծով Microsoft –ի գլխավոր մենեջեր Բրենդոն Լեբլանկին։
Նրա խոսքով, հին բաժնին փոխարինելու կգա նորը, որը «Կարգավորումներ» (Settings) անունն է ստացել, ասել է Լեբլանկը, տեղեկացնում է RG-ը։
Մինչեւ Windows 8-ի հայտնվելը օպերացիոն համակարգերում կարգավորումների փոփոխման համար օգտագործվում էր միայն «Կառավարման պանել» բաժինը։ «Ութնյակի» թողարկմամբ հայտնվել է «Կարգավորումներ» բաժինը, որը հարմարեցված է սենսորային էկրանների։ Ընդ որում նույնիսկ Windows 10-ում ծրագրավորողները մինչեւ հիմա չեն հրաժարվել «Կառավարման պանելից»։