Երեւանում վրաերթի հետևանքով մահացած 8 ամսական երկվորյակ եղբայրների պապը` Միքայել Հարությունյանը, հերքում է պաշտպանական կողմի հայտարարություններն այն մասին` իբր իրենք հանդիպել են մահացած երկվորյակների մոր` Աննա Հարությունյանի հետ, նրան դրամական փոխհատուցում տվել։ NEWS.am-ի հետ զրույցում Միքայել Հարությունյանը նաև ծիծաղելի համարեց պաշտպանական կողմի այն հայտարարությունը, թե տուժող կողմի բոլոր գործողություններն ուղղված են իրենցից գումար կորզելուն` նշելով, որ իրենք միայն պահանջում են օրենքի ամբողջ խստությամբ պատժել իրենց երեխաների մահվան պատճառ դարձած Ռազմիկ Ավետիսյանին:
«Իմ աղջիկը 8 ամսական 2 երեխա է կորցրել և նրանց նման հայտարարություններին անգամ չեմ էլ ուզում անդրադառնալ, ինձ նրանց կարծիքը չի հետաքրքրում, ինչ ուզում են, թող ասեն: Բացարձակ իրենց հետ ոչ հանդիպել ենք, ոչ էլ որևիցե կոնտակտի մեջ ենք եղել, որ հիմա էլ նման հայտարարություններ են անում: Ամենալավ դատավորը ժամանակն է, վերջում ամեն ինչ պարզ կլինի: Սպանություն է եղել, ես ուզում եմ, որ դատվի ու գնա նստի, ես այդ պահանջով գնալու եմ մինչև վերջ»,-ասաց Միքայել Հարությունյանը:
Դատական նիստն այսօր հերթական անգամ հետաձգվեց, դատավորը չէր ներկայացել։
Նշենք, որ ավելի վաղ NEWS.am-ի հետ զրույցում պաշտպանական կողմը հայտարարել էր, որ տուժող կողմի բոլոր գործողություններն ուղղված են իրենցից նյութական փոխհատուցում ստանալուն:
Հիշեցնենք, որ ըստ մեղադրական եզրակացության` 2015թ. փետրվարի 19-ին Երևանի 50-ամյա բնակիչ Ռազմիկ Ավետիսյանն իր «Ֆոլքսվագեն» մակնիշի ավտոմեքենայով Մարաշի Արմենակյան փողոցի թիվ 122 հասցեի դիմաց՝ 40կմ/ժ արագությամբ ընթանալով վրաերթի է ենթարկել 82-ամյա Անահիտ Կարապետյանին, ապա դուրս եկել երթեւեկելի գոտուց եւ բարձրանալով մայթին` վրաերթի ենթարկել 29-ամյա Աննա Հարությունյանին, նրա 8 ամսական երկվորյակ որդիներին մահ պատճառելով:
Ռազմիկ Ավետիսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասով, այն է`ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթեւեկության եւ տրանսպորտային միջոցների շահագործման կանոնները խախտելը, որը անզգուշությամբ առաջացրել է երկու կամ ավելի մարդու մահ՝ պատժվում է ազատազրկմամբ՝ չորսից տասը տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով:
Ռազմիկ Ավետիսյանը կալանավորված է:
