Հոկտեմբերի 11-ին Մոսկվա այցելած Սաուդյան Արաբիայի ներկայացուցիչները Ռուսաստանին չեն հրավիրել ներառվել «Իսլամական պետության» դեմ պայքարող կոալիցիայի կազմում: Հեռուստատեսային հարցազրույցում այս մասին հայտարարել է ՌԴ ԱԳ նախարար Սերգեյ Լավրովը:
ՌԻԱ Նովոստիի-ի փոխանցմամբ, նա ընդգծել է, որ իրականությանը չեն համապատասխանում լրատվամիջոցների հրապարակումները «կործանարար հետեւանքների» մասին, որոնք սաուդյան կողմը խոստացել է Ռուսաստանին Սիրիայում գործողությունների հետ կապված:
«Ո՛չ, դա ճիշտ չէ: Ես լսել եմ նաեւ որոշ աղբյուրների հայտարարությունների մասին, թե մեզ նախազգուշացրել են, որ «կործանարար հետեւանքներ» կլինեն: Ամենեւին էլ այդպես չէ: Խոսքը գործողությունների համակարգման անհրաժեշտության մասին է եղել: Հստակ հաստատվել է, որ մենք պայքարում ենք ահաբեկչության դեմ, որ մենք չենք պայքարում սիրիական հայրենասեր ընդդիմության դեմ: Հակառակը, մենք ցանկանում ենք սիրիական ընդդիմության հետ համակարգել մեր գործողություններն ու նրան օգնել վերադարձնել ահաբեկիչների գրաված տարածքները, ինչպես եւ օգնում ենք սիրիական կառավարական բանակին»,- հայտարարել է Լավրովը:
Նախարարի խոսքով, բանակցությունների ընթացքում ռուսական կողմը մանրամասն պարզաբանել է իր դիրքորոշումը: