Քաղաքական որեւէ նորություն այս ամառվա ընթացքում չգրանցվեց. ուշագրավ էր միայն ռուսական ռազմաբազայի ներկայության ժամկետի երկարձգման մասին հայ-ռուսական պայմանագիրը։ Օգոստոսի 28-ին տեղի ունեցած մամուլի ասուլիսի ժամանակ նման տեսակետ հայտնեց Ժողովրդական կուսակցության նախագահ Տիգրան Կարապետյանը։
Նշելով, որ ինքն ուրախ է այդ պայմանավորվածության համար, Կարապետյանը համոզմունք հայտնեց, որ ռուսական զինուժի ներկայությունն «այս դժվար ժամանակաշրջանում մեզ երաշխիք է տալիս չվախենալ թուրքից եւ հզոր ձեւով հակադարձել Ադրբեջանին»:
«Հայաստանում ռուսական ռազմաբազայի ներկայությունն ավելի կարեւոր է, քան պարզապես զենք ներկրելը»,-նկատեց Ժողովրդական կուսակցության նախագահը՝ ավելացնելով, որ ռազմաբազայի ներկայությունը 49 տարով երկարձգելու մասին հայ-ռուսական պայմանավորվածությամբ Ռուսաստանը կանխեց ԱՄՆ-ի՝ տարածաշրջան խաղաղապահ ուժեր մտցնելու նկրտումները։ «Իր այս քայլով Ռուսաստանը փակեց հարավային դարպասը՝ ցույց տալով ԱՄՆ-ին, որ նա անկարող է Վրաստանի տարածքով ՆԱՏՕ-ի ուժեր սփռել տարածաշրջանում։ Սրանով Ռուսաստանն օգնեց նաեւ Իրանին», -կարծիք հայտնեց Կարապետյանը։
Անդրադառնալով «Ժառանգություն» կուսակցության այն դիտարկմանը, թե Հայաստանն, անհրաժեշտության դեպքում, պետք է դուրս գա ՀԱՊԿ կազմից, Ժողովրդական կուսակցության նախագահը ընդգծեց, որ «այդ կուսակցությունը ամերիկյան նախագիծ է եւ շահագրգռված է, որպեսզի ամերիկյան առաջնայնությունները տարածաշրջանում ավելի կարեւոր լինեն, քան ռուսականը»: «Փաստ է, որ ամերիկյան նախագծերի մեջ ներառված ուժերը միշտ էլ արջի ծառայություններ են մատուցում»,- ամփոփեց Կարապետյանը։