Պարագվայի Սենատի կողմից հայոց ցեղասպանության ճանաչման եւ դատապարտման վերաբերյալ որոշման ընդունումը վկայում է, որ երկրի քաղաքական լայն շրջանակներում հավատում են արդարադատությանը եւ մարդու իրավունքներին։  Այդ մասին  NEWS.am-ի թղթակցի հետ զրույցում հայտնել է ՀՅԴ Դաշնակցության անդամ, Սոցինտերնի՝ ԱՊՀ, Կովկասի եւ Մերձսեւծովյան   երկրների հանձնաժողովի փոխ-նախագահ Մարիո Նալբանդյանը, որն ակտիվորեն մասնակցում է Հարավային Ամերիկայում  Հայ դատի գրասենյակի գործունեությանը։ 

Դա, նրա խոսքով, այն մասին է վկայում, որ Պարագվայում գիտակցում են՝ հայ   ժողովուրդը ոչնչացման է ենթարկվել պետական մակարդակում մշակված պլանով։  «Պարագվայում գիտակցում են, որ մենք կարող ենք հույս դնել իրենց աջակցության վրա։ Դրա շնորհիվ մենք որոշակի աջակցություն ենք զգում նաեւ Լեռնային Ղարաբաղի ճանաչման եւ, ինչո՞ւ չէ, Հայաստանի զարգացման գործում»,- հավելել է Մարիո Նալբանդյանը։

Հիշեցնենք, որ հոկտեմբերի  29-ին Պարագվայի Սենատի կողմից ընդունված որոշման տեքստում ասվում է․ «Պարագվայի հանրապետության սենատը ճանաչում է 1915 – 1923 –ին հայ ժողովրդի վերապրած ցեղասպանությունը, որն իրականացվել է Թուրք Օսմանյան կայսրության կողմից եւ այս տարի վկայակոչում մարդկության դեմ այդ հանցագործության  100-րդ տարելիցը»։