Լոռու մարզի Վանաձորի քաղաքի բնակիչ, 21-ամյա Հրայր Հարությունյանին առաջադրված մեղադրանքը վերաորակվել է՝ սպանության փորձից դառնալով դիտավորությամբ առողջությանը ծանր վնաս պատճառելը: Այս մասին NEWS.am-ի թղթակցի հետ զրույցում ասաց Հարությունյանի փաստաբան Ռուբեն Հակոբյանը:
«Դեպքը տեղի է ունեցել 2013թ.-ին: Իմ պաշտպանյալը տեսել է, թե ինչպես է իր ընկերը վիճում տուժող Սեյրան Հարությունյանի հետ, մոտեցել է, մի քանի րոպե զրուցել են, որը վերածվել է վիճաբանության, եւ իմ պաշտպանյալը դանակով հարվածել է նրան: Հրայրը դիտավորությամբ չի հարվածել, նա այդ մեղադրանքը չի ընդունում»,- ասաց Ռուբեն Հակոբյանը:
Փաստաբանը պատմեց, որ իր պաշտպանյալը դեպքից օրեր առաջ էր կալանավայրից դուրս եկել, որոշել էր կյանքը դասավորել, երբ այդ դեպքը պատահել է:
«Իսկ Սեյրան Հարությունյանը նախկինում 9 անգամ դատապարտված է եղել: Մեղադրանքը, թե կնոջ եւ մանկահասակ դստեր աչքի առաջ է դանակով հարվածել, իրականությանը չի համապատասխանում: Իմ պաշտպանյալը չի տեսել ոչ մեկին այդ տարածքում: Դեպքը տեղի է ունեցել տուժողի տան մոտ, հնարավոր է՝ վիճաբանությունների ձայների վրա դուրս եկած լինեն տնից, չենք կարող ասել»,- նշեց Ռուբեն Հակոբյանը:
Ըստ մեղադրական եզրակացության՝ Հրայր Հարությունյանը 2013 թ. հոկտեմբերի 12-ին վիճաբանել է Սեյրան Հարությունյանի հետ: Անտեսելով նրա կնոջ և մանկահասակ դստեր ներկայությունը և չհարվածելու խնդրանքները՝ Հրայրը ցուցաբերել է բացառիկ անգթություն, հարձակվել և իր մոտ գտնվող ծալովի դանակով հարվածներ է հասցրել Սեյրան Հարությունյանին՝ դիտավորությամբ առողջությանը պատճառելով ծանր վնաս:
Հրայր Հարությունյանին մեղադրանք է առաջադրվել Քրեական օրենսգրքի 112-րդ հոդվածի 2-րդ մասի 4-րդ կետով: Խափանման միջոց է ընտրվել կալանավորումը:
Գործն ուղարկվել է Լոռու մարզի ընդհանուր իրավասության դատարան: