Հայաստանի նախագահ Սերժ Սարգսյանը ուսանողների ու աշակերտների հետ հանդիպման ժամանակ պարզաբանել է, թե ինչո՞ւ ուսման մեջ հաջողություններ ունենալով ու մեդալ ստանալով, որոշ ուսանողներ, այդուհանդերձ ստիպված են վճարովի ուսում ստանալ բուհում: Նման հարց է ուղղել ԵՊՀ իրավագիտության ֆակուլտետ ընդունված ուսանողներից մեկը, ով անվճար տեղերի կրճատման պատճառով ընդունվել է վճարովի համակարգ:
Սերժ Սարգսյանը բացատրել է, թե ինչպե՞ս է ձեւավորվում եւ հաստատվում պետական պատվերը, եւ ինչո՞ւ պետությունն իր ներկայիս հնարավորություններով ի վիճակի չէ վճարել ավելի շատ տեղերի համար. «Ցավոք, մենք չունենք այն հնարավորությունները, որ միգուցե այլ երկրներում կան, որպեսզի բոլոր մասնագիտությունները լինեն անվճար:
Պետությունն ընտրություն է կատարում, թե ո՞ր մասնագիտությունն ընտրի: Տվյալ պարագայում, թե ինչո՞ւ է այդպիսի ընտրություն կատարվել, պատճառը հետեւյալն է` իրավագետի մասնագիտություն ստացողների քանակը շատ է, ձեզ անկեղծորեն եմ ասում: Սա է եղել պատճառը, բայց այս դեպքերում էլ կան հնարավորություններ` օգնելու բոլոր նրանց, ովքեր ի վիճակի չեն վճարել ուսման վարձը: Մենք այդ հնարավորությունների մասին բոլոր գերազանց սովորողներին կտեղեկացնենք»,- ասել է երկրի նախագահը: