Ռուսաստանի Դաշնային ժողովի Դաշնության խորհրդի նախագահ Վալենտինա Մատվիենկոյի գլխավորած պատվիրակությունը նոյեմբերի 3-ի առավոտյան այցելել է Ծիծեռնակաբերդ՝ Հայոց ցեղասպանության զոհերի հուշահամալիր (ֆոտոռեպորտաժ)։ Ռուսաստանի Դաշնային ժողովի Դաշնության խորհրդի նախագահին ուղեկցում էին Հայաստանի Ազգային ժողովի փոխնախագահ Հերմինե Նաղդալյանը եւ Հայաստանում Ռուսաստանի արտակարգ եւ լիազոր դեսպան Իվան Վոլինկինը։
Վալենտինա Մատվիենկոն ծաղիկ է դրել Հայոց ցեղասպանության զոհերի հուշահամալիրում՝ հարգանքի տուրք մատուցելով մեկ ու կես միլիոն զոհերի հիշատակին։ Դաշնության խորհրդի ղեկավարն այցելել է նաեւ Հայոց ցեղասպանության Թանգարան-ինստիտուտ, որտեղ փոխտնօրեն Սուրեն Մանուկյանի ուղեկցությամբ ծանոթացել է արխիվային փաստաթղթերին եւ ցուցանմուշներին, որոնք վկայում են 20-րդ դարի առաջին ցեղասպանության մասին, որն իրականացվել է հայ ժողովրդի նկատմամբ։ Վալենտինա Մատվիենկոն չի կարողացել դիմանալ իր տեսածին եւ լաց է եղել։ Այցելության ավարտին նա գրություն է թողել Հայոց ցեղասպանության Թանգարան-ինստիտուտի Սգո մատյանում։
Լուսանկարները՝ Արսեն Սարգսյանի/NEWS.am