Տուլայի մոտ 9 մարդու կյանք խլած` Մոսկվա–Երեւան երթուղու ավտոբուսի վթարի 9–րդ զոհը`68–ամյա Հռիփսիմե Սիրեկանյանը Մոսկվա էր մեկնել երկու ամիս առաջ` եղբոր հուղարկավորությանը մասնակցելու։ Այս մասին NEWS.am–ի հետ զրույցում ասաց մահացածի որդին` Արա Սիրեկանյանը։
«Գնացել էր եղբոր թաղմանը, հետո որոշ ժամանակ որոշել էր մնար եղբորս ու քրոջս մոտ, որոնք Մոսկվայում են բնակվում»,– ասաց նա։
Տիկին Սիրեկանանը երեք երեխաների մայր էր, նրա ամուսինը երկար տարիներ եղել է Արմավիրի պրոֆտեխուսումնարանի, ապա Նոր Կեսարիա համայնքի դպրոցի տնօրենը։
Նա ամուսնու եւ որդու ընտանիքի հետ բնակվում էր Արմավիր քաղաքում։
Առողջապահության նախարարությունից NEWS.am–ին տեղեկացրին, որ Հռիփսիմե Սիրեկանյանի մարմինը, ամենայն հավանականությամբ, վաղը կտեղափոխվի Հայաստան։
Ինչպես ավելի վաղ հայտնել էր NEWS.am-ը, նոյեմբերի 3-ի գիշերը Մոսկվա-Երեւան ավտոբուսի վթարի հետեւանքով մի քանի տասնյակ մարդ է տուժել, 9 մարդ մահացել է:
Վթարի հետ կապված քրեական գործ է հարուցվել «ճանապարհային երթեւեկության եւ տրանսպորտային միջոցների շահագործման կանոնների խախտում» հոդվածով։ Համանման քրեական գործ է հարուցված նաեւ Հայաստանում։ Նախնական տվյալների համաձայն, վարորդը ղեկի մոտ քնել է։ Վարորդ Գառնիկ Հարությունյանը կալանավորված է:
