Ռուսաստանի նախագահ Դմիտրի Մեդվեդեւի Բաքու այցելությունը կարգավիճակով ցածր է. այն ոչ թե պետական է, ինչպես Մեդվեդեւի Երեւան այցելությունը, այլ պաշտոնական: Այս մասին NEWS.am-ի թղթակից հետ զրույցում ասաց ՀՀԿ խմբակցության պատգամավոր Գագիկ Մելիքյանը, մեկնաբանելով ՌԴ Նախագահ Մեդվեդեւի այցելությունն Ադրբեջան:
Նրա խոսքով, հենց այդ հանգամանքից էլ երեւում է հայ-ռուսական եւ ռուս-ադրբեջանական հարաբերությունների տարբերությունները: «Այն ավելի շատ հիշեցնում է հերթապահ այցելություն, որի նպատակն է հանդարտեցնել Ադրբեջանում ծավալվող հակառուսական հիստերիան, կապված Հայաստանի հետ շահերի ամրապնդման, հնարավոր ագրեսիայի դեպքում Հայաստանը պաշտպանելու Ռուսաստանի հանձնառությամբ եւ դրա մասին ամենաբարձր մակարդակի հայտարարությամբ: Ստորագրվելու է ընդամենը երկու փաստաթուղթ , որոնցից քիչ թե շատ լուրջ է պետական սահմանի մասին փաստաթուղթը»,- ասաց Գ. Մելիքյանը:
Ինչ վերաբերում է Մեդվեդեւի հայաստանյան այցին, հանրապետական պատգամավորն ասաց. «Հայ-ռուսական հարաբերությունները, որոնք ունեն դարավոր պատմություն ու կայացած ավանդույթներ, նոր փուլ թեւակոխեցին օգոստոսի ՌԴ նախագահ պետական այցելությամբ Հայաստան, որի ընթացքում հարաբերությունների հետագա խորացման վերաբերյալ մի շարք պայմանավորվածություններ ձեռք բերվեցին, կարեւորագույն փաստաթղթեր ստորագրվեցին»:
