Իրանական գազը Վրաստանի համար կարող է այլընտրանքային լինել։ Այս մասին նոյեմբերի 11-ին՝ «Ռուս-իրանական համագործակցության ազդեցությունը հարավկովկասյան տարածաշրջանի վրա» թեմայով քննարկման ժամանակ ասել է Վրաստանի ատլանտյան խորհրդի ղեկավար, պաշտպանության նախկին նախարար Դավիթ Սիխարուլիձեն։
Նա միաժամանակ նշել է, որ իրանական գազը միշտ ավելի թանկ է եղել, քան կասպիականը։ «Սակայն հաշվի առնելով այն հանգամանքը, որ մեզ համար էներգետիկ անվտանգությունը շատ կարեւոր է, մենք կարող ենք այդ հարցը քննարկել Իրանի եւ Հայաստանի հետ»,- ընդգծել է Սիխարուլիձեն։ Նրա խոսքով՝ Ռուսաստանը միշտ էլ իր գազն օգտագործել է քաղաքական նպատակներով, եւ տարածաշրջանում Մոսկվայի ազդեցության ուժեղացումը Վրաստանի շահերից չի բխում։