Երեւան կատարած այցի շրջանակներում  ՌԴ արտգործնախարար Սերգեյ Լավրովի եւ Հայաստանի ղեկավարության միջեւ  բանակցությունների ժամանակ ղարաբաղյան հակամարտության կարգավորման ենթատեքստում տարածքային զիջումներ անելու թեման չի քննարկվել։

Այս մասին NEWS.am-ի հարցմանն ի պատասխան՝ ասել են Հայաստանում ՌԴ դեսպանատանից՝ անդրադառնալով այն հարցին, թե ՀՀ իշխանությունները ՌԴ արտգործնախարար Սերգեյ Լավրովի՝ Երեւան կատարած վերջին այցի ժամանակ քննարկել են արդյոք ադրբեջանական կողմին տարածքային զիջումներ անելու կամ ղարաբաղյան  հակամարտության կարգավորման այլ ցավոտ հարցերը։

Ինչպես նշել են ՌԴ դեսպանատնից, Սերգեյ Լավրովը Երեւանում ունեցած հանդիպումների ժամանակ քննարկել է ղարաբաղյան հակամարտության խաղաղ կարգավորման ներկայիս փուլը ԵԱՀԿ Մինսկի խմբի համանախագահ երկրների ջանքերի ենթատեքստում։

Նշենք, որ «Հայկական ժամանակ», «Ժողովուրդ» թերթերն ու ռուսական «Կոմերսանտ»-ը, վկայակոչելով իրենց անանուն աղբյուրները, գրել էին, որ Սերգեյ Լավրովը Հայաստան է եկել՝ երկրի ղեկավարությանը համոզելու Ադրբեջանին վերադարձնել ԼՂՀ-ի շուրջ անվտանգության գոտի համարվող տարածքների մի մասը։