Հայոց ցեղասպանության հարցում Թուրքիայի դիրքորոշման պատճառով շատ երկրներ, այդ թվում՝ ԱՄՆ-ն, Մեծ Բրիտանիան եւ Ավստրալիան, հրաժարվում են ճանաչել հանցագործությունը: Այդպես են վարվում՝ հաշվի առնելով Թուրքիայի հետ դիվանագիտական եւ առեւտրային հարաբերությունները: Այս մասին գրում է Green Left-ը:
Ըստ հոդվածի, 1915 թվականի ապրիլի 24-ին Օսմանյան կայսրությունում սկսվեց 1.5 մլն հայերի կոտորածը: «Դա վտանգավոր նախադեպ դարձավ, որն ընդօրինակեցին եւ հետագայում տարածեցին տարբեր երկրների բռնապետական կառավարությունները: Չնայած համաշխարհային պատմության մեջ դրա ցավագին տեղին, աշխարհի կառավարությունները, այդ թվում՝ խոշոր գերտերությունները, հրաժարվում են ընդունել, որ այդպիսի բան տեղի է ունեցել»,- նշված է հրապարակման մեջ:
Մինչ օրս, ըստ հոդվածագրի, թուրքական կառավարությունը հրաժարվում է ճանաչել Հայոց ցեղասպանությունը: «Այն պնդում է, որ դա «արեւմտյան սուտ» է: Թուրքիան միլիոնավոր դոլարներ է ծախսել՝ փորձելով Հայոց ցեղասպանությունը ջնջել սեփական պատմությունից, կործանելով հայկական հուշարձանները եւ նույնիսկ փոխելով Հայաստանի անվան հետ կապված կենդանիների անունները»,- նշվում է հոդվածում:
Պարբերականի համաձայն, կառավարությունների կողմից Հայոց ցեղասպանության ճանաչումից հրաժարվելը հիասթափություն առաջացրեց վերապրածների եւ նրանց ընտանիքների շրջանում. այդ մարդիկ սարսափելի վայրագություններ են տեսել, որոնք մնացել են նրանց հիշողության մեջ:
«Այս միտումը Թուրքիայում շարունակվում է նաեւ 21-րդ դարում՝ քուրդ բնակչության դեմ պատերազմի տեսքով: «Իսլամական պետության» դեմ պայքարի ընթացքում Թուրքիան հարձակումներ է գործում երկրի քուրդ բնակչության դեմ: Ինչպես եւ Հայոց ցեղասպանության պարագայում, Թուրքիայի քուրդ բնակչությունը միջազգային հանրության աջակցությունը չստացավ:
Եթե պատմությունը մեզ որեւէ բան սովորեցրել է, ապա այն, որ եթե անցյալի հանցագործությունները չեն ճանաչվում եւ չեն պատժվում, դրանք նորից են տեղի ունենում: Մենք պետք է ճանաչենք Հայոց ցեղասպանությունը՝ նոր ցեղասպանությունները կանխելու համար»,- ամփոփել է Green Left-ի հոդվածագիրը:
