Կոտայքի մարզի Հանքավանի «Տաք ջուր» առողջավայրում նոյեմբերի 16-ին երեք անձի սպանելության մեղադրանքով կալանավորված Հայրապետ Սեփոյանի հորը՝ Գագիկ Սեփոյանին տեղափոխել են «Սուրբ Գրիգոր Լուսավորիչ» բժշկական կենտրոնի Նեյրովիրաբուժական բաժանմունք: Այս մասին այսօր՝ նոյեմբերի 20-ին, NEWS.am-ին տեղեկացրին են «Սուրբ Գրիգոր Լուսավորիչ» բժշկական կենտրոնից՝ նշելով, որ Գագիկ Սեփոյանի առողջական վիճակը բավարար է, նա ապաքինվում է:
Նշենք, որ ըստ նախնական տեղեկությունների՝ կողմերի վիճաբանության պատճառը եղել է ծառահատումը: Ըստ այդմ, սպանված երիտասարդները` Վարդան ու Վահե Գալստյանները Հայրապետ Սեփոյանի հոր հետ վիճել են այն պատճառով, որ վերջինս կտրել է նրանց հոր` Հանքավանում գործարար Ֆրունզե Գալստյանի տնկած ծառը: Նախնական տեղեկություններով՝ ի սկզբանե վեճը կտրած ծառի պատճառով է եղել, որը ողբերգական հանգուցալուծում է ունեցել:
Ավելի վաղ NEWS.am-ը հայտնել էր, որ Հանքավանի «Տաք ջուր» կոչվող վայրում կրակել են մեքենայի ուղղությամբ, ինչի հետեւանքով երեք տղամարդ է մահացել՝ երկուսը տեղում, մեկը՝ հիվանդանոցի ճանապարհին:
Հայրապետ Սեփոյանը կալանավորվել է:
