Երեւանի «Շենգավիթ» բժշկական կենտրոնում նոյեմբերի 19-ին երեկոյան 25-ամյա ծննդկանի արգանդում 36 շաբաթական պտուղի մահվան մեջ հարազատները մեղադրում են բժիշկներին:
NEWS.am-ի թղթակցի հետ զրույցում ծննդկան Լարիսա Շահբազյանը տագրը՝ Արթուր Քոչարյանը, պատմեց, որ հարսին «Շենգավիթ» ԲԿ են ուղեգրել Արմավիրի բժշկական կենտրոնից:
«34 շաբաթական հղիության մեջ էր Լարիսան, երբ ընդունվեց «Արմավիր» ԲԿ: Այստեղ 3 օր պահելուց հետո հարսիս մոտ տեղի ունեցավ պտղաջրերի վաղ արտահոսք, տեղափոխեցինք Երեւանի «Շենգավիթ» բժշկական կենտրոն: Այստեղ երկու շաբաթ մնալուց հետո նորից պտղաջրերի վաղ արտահոսք եղավ, երկու անգամ արհեստական ցավեր տվեցին, որ ծննդաբերի»,- դեպքի մանրամասները պատմեց Արթուր Քոչարյանը, որը մասնագիտությամբ բժիշկ է:
Քոչարյանի խոսքով՝ եթե Լարիսային հետազոտեին, պետք է անմիջապես կեսարյան հատում կատարեին, բայց հերթապահ բժիշկը միայն արհեստական ցավեր է տվել:
«Սա հիվանդանոց չէ, չգիտեմ էլ՝ ինչի է... հարսիս գոնե ծնարան տանեին, իմանային՝ ինչ է կատարվում: Միայն ցավեր են տվել, հետո էլ հարսս զգացել է, որ երեխան այլեւս չի շարժվում: Երբ բժիշկները տարել են հետազոտման, հայտարարել են, թե սրտի կանգ է գրանցվել, իսկ Անի Սեյրանովնան չգիտենք ինչով էր զբաղված այդ պահին»,- շարունակեց ծննդկանի տագրը:
Հարազատները դեպքից անմիջապես հետո ցանկացել են խոսել բաժնի վարիչի կամ տնօրինության ներկայացուցչի հետ, սակայն ոչ ոք այդպես էլ իրենց չի ընդունել:
«Երբ ես տեսա պտուղը, պորտալարն այնպես էր փաթաթվել, որ վիզը պոկել էր... Իրենք պետք է անմիջապես կեսարյան անեին, երեխային հանեին, ոչ թե թողնեին, էդպիսի ողբերգություն լիներ: Առողջ երեխա էր, 36 շաբաթական, թոքերն ամբողջությամբ գործում էին»,- հայտնեց Արթուր Քոչարյանը:
Նշենք, որ Լարիսա Շահբազյանի հարազատները պատրաստվում են դիմել իրավապահ մարմիններին:
Կատարվածի վերաբերյալ «Շենգավիթ» բժշկական կենտրոնից որեւէ մեկնաբանություն չտվեցին:
