Ադրբեջանն ընդամենը երկու գործիք ունի ղարաբաղյան հարցում իրավիճակի վրա ազդելու համար՝ հռետորաբանությունը՝ խոսքեր, որոնք սակայն այլեւս չեն ազդում, ու հրաձգությունը սահմաններին: Այս մասին նոյեմբերի 24-ին «Ղարաբաղյան հարց. Հայկական դիվանագիտության խնդիրներն ու հեռանկարները» թեմայով Ադրբեջանական ԽՍՀ-ից փախստականների համագումարի նախագահության կազմակերպած քննարկման ընթացքում հայտնել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Ադրբեջանական կողմը, նրա խոսքով, այլընտրանք չունի: «Դա պետական շահերը պաշտպանելու ձեւ է, որը շարունակվում է կրակոցների մակարդակով: Իրատեսական չէ ակնկալել, որ դրանք կդադարեն: Բայցեւ չեմ կարծում, թե լայնածավալ պատերազմի վերսկսման հեռանկար կա»,- նշել է Իսկանդարյանը:
