Հինգ աղջկա սեռական շահագործման նպատակով Դուբայ ուղարկելու մեջ մեղադրվող`Հրազդան քաղաքի 36–ամյա բնակչուհի Հերիքնազ Խաչատրյանը իրեն մեղսագրվող հանցանքը չի կատարել եւ պետք է անմեղ ճանաչվի: Այս մասին այսօր` նոյեմբերի 24-ին, Երեւանի Կենտրոն եւ Նորք-Մարաշ վաորչական շրջանների ընդհանուր իրավասության դատարանում պաշտպանական ճառից հետո ասաց ամբաստանյալի պաշտպան Հրանտ Գեւորգյանը` ավելացնելով, որ գործում Հերիքնազ Խաչատրյանին մեղսագրվաղ հանցանքը հիմնավորող բավարար ապացույցներ չկան:
Ամբաստանյալի պաշտպանը նշեց, որ դատաքննության ընթացքում չի ապացուցվել այն փաստը, որ Հերիքնազ Խաչատրյանը կապ է ունեցել մարմնավաճառների հետ եւ նպաստել է նրանց Դուբայ տեղափոխեվելուն եւ սեռական շահագործման ենթարկելուն:
«Նույնիսկ ինկիվիզիցիայի ժամանկներում նման ապացույցների պարագայում մարդուն մեղադրանք չէր առաջադրի: Մարդը մեկի հետ Դուբայում հեռախոսով խոսել է, բերել եք դատի եք տալիս, ի՞նչ հիմքով»,-ասաց պաշտպանը` հավելելով, որ չփարատված մի շարք կասկածնյեր են մնացել եւ խախատվել է ամբաստանյալի իրավունքները:
Հրանտ Գեւորգյանը ընդգծեց նաեւ այն հանգամանքը, որ դատարանը մերժել է 2 առանցքային վկաներին հարցաքննելու վերաբերյալ պաշտպանական կողմի միջնորդությունները:
«Դուբայից Հերիքնազի ընկերը` Ստեֆան Գերչը պետք է գար Հայաստան եւ ցուցմունք տար, որ Հերիքնազը ոչ մի կապ չի ունեցել մարմնավաճաների եւ կավատների հետ: Նրա ցուցմունքը կարող էր էական նշանակություն ունենալ այս գործի ելքի համար»,-ասաց պաշտպանը:
Հերիքնազ Խաչատրյանը դատարանում եւս մեկ անգամ վստահեցրեց, որ ինքը մասնակցություն չի ունեցել հայ աղջիկներին Դուբայ տեղափոխելու եւ սեռական շահագործման ենթարկելու գործին:
«Ձեզնից խնդրում եմ, միայն արդար որոշում կայացրեք: Ես մասնակից չեմ եղել տվյալ հանցագործությանը, նորից եմ կրկնում, ես մեղավոր չեմ»,-ասաց ամբաստանյալը:
Նշենք, որ նախորդ դատական նիստին մեղադրող դատախազը Հերիքնազ Խաչատրյանի համար 13 տարվա ազատազրկում էր պահանջել:
Հաջորդ դատական նիստին` դեկտեմբերի 1-ին, Հերիքնազ Խաչատրյանը վերջին խոսքով հանդես կգա:
Հիշեցնենք, որ Հերիքնազ Խաչատրյանին մեղադրանք է առաջադրվել ՀՀ Քրեական օրենսգրքի 132 հոդվածի, 3-րդ մասի, 1-ին կետով, այն է` կազմակերպված հանցավոր խմբի կողմից անձանց մարմնավաճառության կամ սեռական այլ շահագործման, հարկադիր աշխատանքի կամ ծառայությունների ենթարկելը:
Նույն գործով Հերիքնազ Խաչատրյանի քույրը` Բավական Խաչատրյանը դատապարտվել է 11 տարվա ազատազրկման: Նա ավելի վաղ ցուցմունք էր տվել, թե քրոջ հետ միասին է թրաֆիքինգով զբաղվել, սակայն ավելի ուշ դատարանում հայտարարել էր, թե քննիչների ճնշումների ներքո է նման ցուցմունք տվել, եւ քույրն իրականում այդ գործի հետ կապ չունի։ Հերիքնազ Խաչատրյանը նույնպես իրեն առաջադրված մեղադրանքը չի ընդունում` պնդելով, որ Դուբայում ինքն է թարֆիքինգի զոհ դարձել: