Իշխանությունը պետք է փոխի պատվիրակությունում իր անդամներին, որոնք մեծամասնություն են։ Այս մասին Ազգային ժողովում լրագրողների հետ զրույցում հայտարարել է ԱԺ ՀԱԿ խմբակցության ղեկավար Լեւոն Զուրաբյանը՝ անդրադառնալով Նիկոլ Փաշինյանին պատվիրակությունում իրենով փոխելու լուրերին։
«Ամեն հիմարություն կարող են շրջանառել։ Հիմարությունն այն է, որ շրջանառողները չգիտեն, որ քաղաքական ուժն է որոշում՝ ով է իր ներկայացուցիչը։ Ինչ վերաբերում է իմ թեկնածությանը, Հայ ազգային կոնգրեսի խմբակցությունում պարբերաբար զեկուցվում է իմ գործունեությունը, եւ որեւէ դժգոհություն կամ նկատողություն որեւէ անդամի կողմից երբեք չի հայտնվել, հակառակը բոլորը շատ բարձր են գնահատում իրենց ներկայացուցչի գործունեությունը»,-պարզաբանել է Զուրաբյանը։
Նշենք, որ պատվիրակության կազմի փոփոխության հարցը բարձրացնում են առանձին պատգամավորներ։ ՀՀԿ խմբակցության պատագամավոր Համլետ Հարությունյանն էր անգամ առաջարկել ռոտացիոն կարգով փոփոխել կազմը, ինչին ի պատասխան պատվիրակության ղեկավար Հերմինե Նաղդալյանը պատասխանել էր, թե պատրաստ է տեղը զիջել Համլետ Հարությունյանին։
Հարցին, թե արդյոք կազմի փոփոխությամբ հնարավոր կլինի հասնել հաջողությունների,տապալել հակահայկական զեկույցները, Զուրաբյանը պատասխանել է․ «Իհարկե, կարելի է գնալ այդ քայլին, որովհտեւ միշտ կարելի է գտնել անգլերեն ֆրանսերեն ավելի լավ խոսող մարդիկ , միջազգային պրակտիկային ավելի լավ ծանոթ մարդիկ, մարդկանց, ովքեր գոնե տիրապետում են ՄԱԿ-ի անվտանգության խորհրդի եւ ԵԱՀԿ-ի փատաթղթերին։ Այս ամենը կարելի է անել, բայց անգամ այս փոփոխությունից հետո հարցերը չեն լուծվում, եթե չի ընտրվում ճիշտ ուղերձ, ճիշտ մարտավարություն եւ ճիշտ կորդինացում»։