Hilton միջազգային հյուրանոցային ցանցի վրա հաքերային հարձակում է եղել, որի նպատակն է եղել հաճախորդների վճարման քարտերից տվյալներ ստանալը, հայտնում է Hilton Worldwide ընկերության մամուլի ծառայությունը:
Չարագործներին հետաքրքրում էին քարտերի համարները, անվտանգության կոդերը,դրանց գործողության ժամկետները, քարտերի տերերի անունները, բայց նրանք չէին հետաքրքրվում հաճախորդների հասցեներով ու քարտերի PIN կոդերով:
« Hilton-ը անհապաղ հետաքննություն է սկսել ու ուժեղացրել իր համակարգերի պաշտպանությունը»,- ասված է մամուլի ծառայության հաղորդագրության մեջ:
Հյուրանոցային ցանցի բոլոր հաճախորդներին, որոնք հյուրանոցների ծառայությունների համար վճարել էին 2014 թ. նոյեմբերի 18-ից դեկտեմբերի 5-ը կամ էլ 2015թ. ապրիլի 21-ից հուլիսի 27-ը ժամանակահատվածներում, խորհուրդ է տրվում ստուգել իրենց հաշվեհամարները, հայտնում է BBC–ի Ռուսական ծառայությունը:
Hilton Worldwide ընկերությանը պատկանող ապրանքանիշները միավորում են ավելի քան 3900 հյուրանոցներ՝ աշխարհի 90 երկրներում: Ռուսաստանում ընկերությունը 17 հյուրանոց ունի: