Ճապոնական ոստիկանությունը չորեքշաբթի՝ նոյեմբերի 25-ին, հայտարարել է «Կուդոկայ» կոչվող յակուձա խմբավորման 11 անդամների կալանավորման մասին: Կասկածում են, որ նրանք են հրկիզել այն հյուրանոցները, որոնք չեն ցանկացել սպասարկել քրեական աշխարհի ներկայացուցիչներին, հայտնում է ՏԱՍՍ-ը:
Միջադեպերը կատարվել են 2012 թ. օգոստոսին Կիտակյուսյու քաղաքում: Այդ ժամանակ յակուձաները հրդեհ են կազմակերպել ռեստորաններ ու բարեր ունեցող երկու համալիրների վերելակներում: Այդ համալիրները մասնակցում էին տեղական իշխանությունների կազմակերպած արշավին, որի նպատակն էր հանցագործներին դուրս մղել ռեստորանային բիզնեսից եւ իրենց դռների վրա փակցրել էին «Յակուձաներին մուտքն արգելվում է» հայտարարությունը:
Հրդեհների հետեւանքով հիվանդանոց էր տեղափոխվել չորս մարդ, որոնք թունավորվել էին ծխից եւ այրվածքներ էին ստացել: Հետաքննությունը հիմա ստուգում է կալանավորվածների մասնակցությունը մյուս նմանատիպ միջադեպերին:
