Այս պահին իրավապահ մարմինների ներկայացուցիչները զինված հսկում են Գյումրի մտնող եւ Գյումրիից դուրս եկող ճանապարհները։ Այս մասին հայտնում է NEWS.am-ի Գյումրու թղթակիցը։
Մեր տեղեկություններով` զինված հսկողություն է իրականացվում նաեւ Կոտայքի մարզում, Երեւանում։ Ավելին՝ Շիրակի, Կոտայքի մարզերում կատարվել են նաեւ խուզարկություններ։ Հսկողությունն ու խուզարկությունները պայմանավորված են այսօր վաղ առավոտյան Նորք Մարաշում հայտնաբերված ու վնասազերծված խմբի հետ, որը, ըստ ԱԱԾ հաղորդագրության, կասկածվում է ծանր հանցագործություն կազմակերպելու մեջ։
Ավելի վաղ հաղորդել էինք, որ կասկածվող խմբի վարձակալած տանն այսօր՝ նոյեմբերի 25-ին, ԱԱԾ-ի փոխանցմամբ, ԱԱԾ աշխատակիցները ոստիկանության հետ համատեղ խուզարկությունների ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն:
