Երեւանի «Շենգավիթ» բժշկական կենտրոնի տնօրինությունն արդեն մի քանի օր է՝ փորձում է կապ հաստատել նոյեմբերի 19-ին նախածննդյան փուլում երեխային կորցրած ծննդկանին եւ վերջինիս հարազատներին: Այս մասին NEWS.am-ի թղթակցին ասաց ծննդկանի տագրը՝ Արթուր Քոչարյանը:
«Մի քանի օր է՝ զանգում են, առաջարկում հանդիպել: Էսօր ժամ եմ պայմանավորվել, գնացել եմ, 4 ժամ սպասել, բայց այդպես էլ բուժգծով տեղակալ Դավիթ Մխիթարյանը ինձ չընդունեց: Չեմ հասկանում՝ ինչ է կատարվում: Ինձ էլ ասում են՝ լրատվամիջոցների հետ դեպքի մասին մի խոսեք եւ մենք ներքին կարգով հարցը կլուծենք»,- ասաց Արթուր Քոչարյանը:
Ծննդկանի հարազատներն արդեն գիտեն, որ բժշկուհին, որին իրենք մեղադրում են 36 շաբաթական պտուղի մահվան մեջ, ԲԿ-ի բուժգծով տեղակալի՝ Դավիթ Մխիթարյանի կինն է:
«Ուզում են կոտրել ուրիշ բժշկուհու վրա, բայց մենք գիտենք, որ Սիրունյանն է մեղավոր պատարվածի մեջ»,- նշեց Արթուր Քոչարյանը:
Ավեիլ վաղ NEWS.am-ի թղթակցի հետ զրույցում ծննդկան Լարիսա Շահբազյանի տագրը՝ Արթուր Քոչարյանը, պատմել էր, որ եթե Լարիսային հետազոտեին, պետք է անմիջապես կեսարյան հատում կատարեին, բայց հերթապահ բժիշկը միայն արհեստական ցավեր է տվել
«Սա հիվանդանոց չէ, չգիտեմ էլ՝ ինչի է... հարսիս գոնե ծնարան տանեին, իմանային՝ ինչ է կատարվում: Միայն ցավեր են տվել, հետո էլ հարսս զգացել է, որ երեխան այլեւս չի շարժվում: Երբ բժիշկները տարել են հետազոտման, հայտարարել են, թե սրտի կանգ է գրանցվել, իսկ Անի Սեյրանովնան չգիտենք ինչով էր զբաղված այդ պահին»,- ասել էր ծննդկանի տագրը:
ԲԿ-ից էլ մեզ փոխանցել էին, որ հղին երկու անգամ հետազոտվել էր:
«Ապա բժիշկները կեսարյան են արել մեկ այլ հիվանդի: Երբ դուրս են եկել վիրահատարանից, հետազոտել են, պարզվել է, որ սրտի բաբախ չկա: Այնուհետեւ արդեն տեսել ենք, որ պորտալարը փաթաթված է եղել»,- ասել էր բուժգծով տեղակալը՝ նշելով, որ կնոջ տագրը նույնպես ներկա է եղել ծննդալուծմանը: